Ispanııadan esirtki tasymaldaǵan qazaqstandyq 16 jylǵa sottaldy

ASTANA. KAZINFORM – Bıylǵy aqpanda kóliktegi polıtsııa departamentiniń qyzmetkerleri arnaıy operatsııa barysynda elordaǵa Ispanııadan jetkizilgen iri esirtki partııasynyń jolyn kesti, dep habarlaıdy Kazinform.

Jedel-izdeý is-sharalarynyń barysynda Astananyń poshta baılanysy bólimsheleriniń birinde oralǵan zat tabylǵan. Saraptama onyń 700 gramnan kóp kannabıs shaıyry ekenin anyqtady.

Esirtki jelisiniń 23 jastaǵy kýreri zatty alý kezinde, ıaǵnı qylmys ústinde ustaldy. Onyń turatyn jerin tekserý kezinde esirtkini oraýǵa arnalǵan zattar, tarazy sonymen qatar qupııa oryndarǵa jasyrý arqyly esirtkini uzaq ýaqyttan beri saýdalap júrgenin rastaıtyn beınejazba tabyldy.

Tergeý barysynda anyqtalǵanyndaı, ustalǵan adam qupııa messendjerler arqyly esirtkini bólshektep, Astana aýmaǵynda saýdalaýmen aınalysqan.

Kólik polıtsııasy esirtkiniń halyqaralyq tasymal jolyn joıdy. Mamyr aıynda sot aıypkerdi kináli dep taýyp, 16 jylǵa bas bostandyǵynan aıyrdy.

Buryn matematıka pániniń muǵalimi bolyp jumys istegen azamattyń esirtki tasymaldap, ustalǵany týraly jazdyq.