Ispanııadan 150-den astam qazaqstandyq elge oraldy

NUR-SULTAN. QazAqparat – Qazaqstannyń 150-den astam azamaty Ispanııadan otanyna oraldy, dep habarlaıdy QazAqparat QR Syrtqy ister mınıstrligine silteme jasap.

«28 naýryzda Qazaqstannyń 44 azamaty (kópshiligi stýdentter men birneshe bala) «Belavia» áýekompanııasynyń reısimen Barselona áýejaıynan Mınsk arqyly Nur-Sultan men Almatyǵa ushyp ketti. Bul Madrıdtegi Qazaqstan Elshiligi jáne Barselonadaǵy konsýldyq qyzmetkerleriniń tıimdi jumysynyń arqasynda múmkin boldy. Olar Ispanııadaǵy azamattarymyzǵa kúndelikti kómek kórsetýdi jalǵastyrýda.

Ispanııada pandemııanyń jyldam taralýy jaǵdaıynda (72 myńnan asa adam juqtyrǵan) jáne reısterdiń basym kópshiligi toqtaǵan kezde, Qazaqstannyń Ispanııadaǵy Elshiligi Madrıdtegi Belarýs Elshiligi jáne «Belavia» áýekompanııasynyń basshylyǵymen Barselonadan ushýǵa bıletti satyp alǵan barlyq qazaqstandyq jolaýshylardy otyrǵyzýdy qamtamasyz etý úshin 28 naýryzda ushatyn áýe kemesin úlkenirek túrine aýystyrý týraly kelisimge jetti», - delingen málimette.

Qazaqstandyq dıplomattar birneshe kún boıy otandastardy elge qaıtýdyń joldary týraly dereý habarlap otyrǵan.

«Tez arada bıletterdi satyp alýǵa, jaǵdaıdy boljaý qıyn kezde ushýdy keshiktirmeý kerektigi týraly aqparattandyryp, múmkindikti paıdalanýǵa shaqyrdy. Búgingi tańda qazaqstandyq dıplomattardyń kómegimen 150-den astam qazaqstandyq Ispanııadan túrli reıstermen ushyp ketti. Ispanııaǵa emdelýge kelgen jáne kámeletke tolmaǵan Qazaqstan Respýblıkasynyń azamattaryna erekshe kóńil bólinedi», - dedi mınıstrlikten.