Ispanııadaǵy qazaq dıasporasy nemen aınalysyp júr
- Jannat Amangeldiqyzy, ózińiz basqaryp otyrǵan qaýymdastyq týraly tanystyryp ótseńiz. Qaýymdastyqtyń negizgi baǵyty qandaı?
- «Ispanııadaǵy Qazaq úı - Casa kazaja en España» qaýymdastyǵy – mádenı-aǵartýshylyq baǵyttaǵy kommertsııalyq emes uıym jáne óz jumysyn 2022 jyldyń 15 aqpanynda bastady. Búginde biz úsh negizgi maqsatty aýdıtorııamen jumys isteımiz: Ispanııada 15-20 jyldan astam turatyn qazaq otbasylary, keıingi 5 jylda kelgen qazaqtar, sondaı-aq Ispanııada turaqty oqıtyn nemese akademııalyq utqyrlyq baǵdarlamalary boıynsha kelgen qazaqstandyq stýdentter.
Árıne, uıymnyń basty maqsaty – Ispanııadaǵy qazaqtardyń óskeleń urpaǵy arasynda tarıhı dástúrin, tilin, jalpy, Qazaqstannan tys jerlerdegi qazaq mádenıetin, ulttyq bolmysyn saqtaý. Sonymen qatar, Qaýymdastyq qyzmetiniń negizgi baǵyty bilim berýge qatysty. Bul turǵyda mádenıetti saqtaý úshin qazaq tili kýrstaryn ótkizý, jaqynda kelgenderdiń beıimdelýin jeńildetý baǵytynda ıspan tilin oqytý eskerilgen.
Sonymen qatar, SIELE emtıhanyn (Servicio Internacional de Evaluación de la Lengua Española – halyqaralyq ıspan tilin meńgerý deńgeıin baǵalaý qyzmeti) ótkizýge lıtsenzııanyń bolýyna baılanysty bizdiń Qaýymdastyqtyń bilim berý qyzmetteriniń aýqymy artty.
Munymen qosa, bizdiń jumysta mádenı buqaralyq is-sharalar ótkizý qarastyrlǵan. Ashylǵanymyzǵa kóp ýaqyt ótpegenine qaramastan, «Ispanııadaǵy Qazaq úı - Casa kazaja en España» qaýymdastyǵy eýropalyq nemese halyqaralyq deńgeıdegi sezder men kezdesýlerge qatysty. Máselen, 2022 jyly Parıjde ótken Eýropa qazaqtarynyń quryltaıyna qatystyq. Atap aıtqanda, 2023 jyly Qazaq úıi qaýymdastyǵy Germanııanyń Keln qalasynda ótetin kelesi quryltaıǵa qatysýdy josparlap otyr.
Sonymen qatar, 2022 jáne 2023 jyldary ózimiz Naýryzdy atap óttik. Madrıdtegi Dızaın jáne tehnologııa ýnıversıtetimen (UDIT) birlese otyryp, tıisti áleýmettik joba men qazaq jastaryna arnalǵan «Qazaq oıýy» mádenı jobasy uıymdastyryldy.
- Qaýymdyqtyń neshe múshesi bar?
- Qazaqstandyqtar birlestigine Ispanııanyń túrli aımaqtarynda turatyn 100-den astam adam kirdi. Otbasylardyń kóbisi Madrıd, Toreveha, Barselona, San-Sebastıan jáne Valensııa qalalarynda turady. Men Ispanııada 23 jyldan astam ýaqyt turyp jatyrmyn. Qoǵamdyq turǵydaǵy jumystaryma toqtalsam, qazaq, ıspan, orys tilderin oqytýmen aınalysamyn. Ispanııa qazaqtarynyń atynan quryltaılarǵa, konferentsııalarǵa, eýropalyq jáne álemdik deńgeıdegi basqosýlarǵa qatysamyn.
- Ispanııadaǵy otandastarymyz nemen aınalysady?
- Qaýymdastyq músheleriniń arasynda myqty zańgerler, bıznesmender, sondaı-aq belgili aýdarmashylar, ınjenerler, sýretshiler, akterler, kınorejısser jáne basqa da mamandyqtardy meńgergen adamdar bar.
Olardyń árqaısysy óz salasynda Qazaqstannyń oń ımıdjin qalyptastyrýǵa erekshe úles qosyp keledi. Taǵy bir aıta keterlik jaıt, qazaq jastaryna únemi óziniń aqylyn aıtyp, keńes berip otyratyn qarııalar bar.
Bizdiń qaýymdastyqtyń quramyna qazaqtyń ataqty sýretshileri - Tolqyn Saqbaeva men Dáýren Qasteev sııaqty talantty adamdar engen. Qazir Torreveıadaǵy Vega teatrynyń kórkemdik jetekshisi qyzmetin Fatıma Jandosova atqaryp jatsa, Real Madrıd qorynyń resmı ókili retinde Aınur Muqanova tanymal bolyp otyr. Al, Dınara Sháńgereı aýdarmashy jáne Ispanııa men Qazaqstan arasyndaǵy memlekettik baǵdarlamalardyń úılestirýshisi qyzmetinde júr. Eltaı Kóshekov esimdi azamat kásipker, zańger, sondaı-aq Madrid company ári REAL Agentttiginiń negizin qalaýshy.
Aǵa býyn ókilderi arasynda Áýeskúl Áripbaeva men Áspet Saqbaeva qoǵam qaıratkerleri retinde belgili. Olar mádenıet pen dástúr boıynsha keńesshi qyzmetin atqaryp otyr.
Bir jyl jumys barysynda bizdiń birlestigimiz «Otandastar qorymen», Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵymen, búkil Eýropadaǵy qazaq dıasporasymen, Ispanııadaǵy asyrap alynǵan qazaq balalary uıymymen, Qazaqstan Respýblıkasynyń Ispanııadaǵy Elshiligimen, Servantes ınstıtýtymen, Dızaın jáne tehnologııa ýnıversıtetimen (UDIT) jáne basqa da uıymdarmen yntymaqtastyq ornatqanyn aıta ketken jón.
Aldaǵy ýaqytta birqatar is-sharany ótkizbekpiz. Onyń ishinde Ispanııanyń Ulttyq kitaphanasymen jáne qazaq balalary uıymymen birlesip Abaı shyǵarmashylyǵyna arnalǵan jobany iske asyrmaqpyz. Sondaı-aq Oraza aıt merekesine qatysty jınalmaqpyz.
Qaýymdastyq aıasynda óz ıdeıalarymyzdy áleýmettik jeliler arqyly (Instagram: casa.kazaja.es) taratyp jatyrmyz. Bul rette ony Ispanııaǵa barýdy josparlap otyrǵan qazaqstandyq stýdentterge arnalǵan aqparattyq platforma, sonymen qatar ıspandyqtar men basqa da sheteldikterge qazaq mádenıetin tanystyrý alańy retinde paıdalanyp jatyrmyz.
Uıymnyń túpkilikti ıdeıalarynyń biri – qazaq úıin qurý. Birinshiden, onda Ońtústik Eýropanyń túkpir-túkpirinen kelgen qazaqtar úshin mádenı is-sharalar ótkizýge bolady. Ekinshiden, shetel azamattaryna Qazaqstanmen, dástúrimizben, tarıhymyzben jáne tilimizben keńinen tanysýǵa múmkindik jasalady.
- Áńgimeńizge raqmet
