Ispanııadaǵy daýyldan tórt adam mert boldy
BARSELONA. QazAqparat – Ispanııada Glorııa daýyly quıyndy jeldiń turýyna, mol qar jaýyp, aýa temperatýrasynyń tómendeýine alyp keldi. Saldarynan sońǵy eki kúnde tórt adam mert boldy. 30-dan astam provıntsııada eskertý jarııalandy. Dúısenbi kúni daýyldyń negizgi soqqysy Jerorta teńizi jaǵalaýyndaǵy Valensııa jáne Balear araldaryna tıdi, dep habarlaıdy QazAqparat Reuters agenttigine silteme jasap.
Dúısenbi kúni Valensııadaǵy tolqyndar 8,44 metr bıiktikke deıin kóterildi. Port bıliginiń aıtýynsha, bul – rekordtyq kórsetkish.
Qala meri Pedro-Bernardo Devıd Segovııa Avıla ortalyq provıntsııasynda 63 jastaǵy er adam óz úıinde qaza tapqanyn jetkizdi. Ony quıyndy jelden kókke ushqan shatyr jabyndysy jaraqattaǵan. Valensııaǵa jaqyn jerdegi Gandııada 54 jastaǵy úısiz áıel sýyq aýa raıynan mert boldy. Astýrııanyń soltústik-batys bóliginde qar qursaýynda qalǵan jolda avtokólik adamdy soǵyp ketip, ol oqıǵa ornynda mert bolǵan. Tórtinshi qurban bolǵan adam dúısenbi kúni tańerteń óz úıiniń mańynda tabyldy. Ol sýyqtan qaza tapty degen boljam bar.
Katalonııa aımaqtyq úkimeti Jıron, Barselona jáne Katalonııanyń ortalyq aýdandarynda ashyq aspan astynda is-shara ótkizýge tyıym saldy. Bılik ókilderiniń málimeti boıynsha, tártipti buzǵandarǵa aıyppul salynady.
