Ispanııadaǵy temirjol apaty: qaza tapqandar sany 41-ge jetti

ASTANA. KAZINFORM — Jeksenbi keshke qaraı Ispanııanyń ońtústiginde eki joǵary jyldamdyqty poıyzdyń soqtyǵysýy saldarynan keminde 41 adam qaza tapty, dep habarlaıdy Azertadj.

Bul týraly seısenbi kúni tańerteń Andalýsııa aımaǵynyń bıligi men kólik mınıstri jarııalaǵan aldyn ala esepte aıtylǵan.

- Qaza tapqandar sany 41-ge jetti, sebebi keshe keshke (dúısenbi kúni) Iro baǵytyna bet alǵan poıyzdyń bir vagonynan taǵy bir adamnyń máıiti tabyldy, – delingen Andalýsııa aımaqtyq úkimetiniń málimdemesinde.

Seısenbi kúni Ispanııanyń qutqarý qyzmetteri poıyzdyń eń qatty zaqymdanǵan vagondaryna jetý úshin krandardy paıdalanyp, apat saldarynan áli kúnge deıin habar-osharsyz ketken adamdardyń máıitterin shyǵaryp alýǵa tyrysty.

Apat taýly jota etegindegi, záıtún toǵaılarymen kómkerilgen qyratty jerde bolǵan. Oqıǵa ornyna tek bir jolaqty jol arqyly ǵana jetýge bolady, bul aýyr tehnıkanyń qutqarýshylarǵa jetýin qıyndatyp otyr.

Ispan jurtshylyǵy jeksenbi keshke Kordova provıntsııasyndaǵy Adamýz eldi mekenine jaqyn mańda, Madrıdten shamamen 360 shaqyrym ońtústikte bolǵan, Ispanııanyń keń aýqymdy joǵary jyldamdyqty temirjol jelisi tarıhyndaǵy alǵashqy adam ólimimen aıaqtalǵan apattan qatty kúızeliske tústi.

Sarapshylardyń aıtýynsha, relstegi aqaýly túıispe poıyzdardyń relsten shyǵyp, bir-birimen soqtyǵysýyna sebep bolǵan negizgi faktor bolýy múmkin.

Іshki ister mınıstri Fernando Grande-Marlaska dúısenbi kúni keshke memlekettik TVE telearnasyna bergen suhbatynda keminde úsh adamnyń denesi áli de qırandylar astynda jatqanyn málimdedi.

Onyń aıtýynsha, polıtsııaǵa 43 adam habar-osharsyz ketti degen habarlama túsken, bul aldyn ala qaza tapqandar sanyna shamalas. Alaıda mınıstr qutqarý toptary relsten shyǵyp ketken vagondardy tolyq kóterip bitpeıinshe, qaza tapqandardyń túpkilikti sany rastalmaıtynyn eskertti.

Aıta ketelik Ispanııada joǵary jyldamdyqty eki poıyz relsten shyǵyp, 21 adam qaza tapty. Keıinirek adam shyǵyna 39-ǵa jetkeni týraly jazǵan edik. 

Sonymen qatar Ispanııada poıyz apatyna baılanysty úsh kúndik aza tutý jarııalandy.