Ispanııadaǵy sý tasqynynda 28 jastaǵy fýtbolshy kóz jumdy

ASTANA. KAZINFORM – Sý tasqyny saldarynan «Valensııanyń» 28 jastaǵy tárbıelenýshisi qaza tapty. Hose Kastıleho «Dana» daýyly men Valensııa provıntsııasyndaǵy sý tasqynynyń qurbany boldy, dep jazady Football24 saıty.

Sońǵy málimetterge qaraǵanda, oqıǵadan keminde 158 adam qaza tapqan. Valensııanyń keıbir aýdandarynda sý tasqyny saldarynan elektr qýaty men baılanys úzilip, kópirler qırap qaldy.

Valensııa oıynshysy 1996 jyly dúnıege kelgen. «Valensııa» akademııasynan keıin Ispanııanyń tómengi dıvızıonyndaǵy klýbtarda óner kórsetti. Hose mansabynda «Alıkante», «Eldense», «Paterna», «Býnol», «Rekambos Kolon», «Roda» jáne basqa da klýbtarda oınaǵan.

Eske sala keteıik, buǵan deıin Ispanııadaǵy sý tasqynynan qaza tapqandar sany 158 adamǵa jetkenin habarlaǵan bolatynbyz.