Ispanııadaǵy Rojdestvo lotereıasy: júlde órtten zardap shekken aýyldarǵa buıyrdy
ASTANA. KAZINFORM – Ispanııadaǵy dástúrli Rojdestvolyq lotereıa El Gordo bıyl orman órtinen qatty zardap shekken eldi mekenderge qýanysh syılady. 2025 jylǵy utys oıynynda 79 432 nómiri jeńimpaz dep tanyldy, dep habarlaıdy Euronews.
Utys ádettegideı teledıdar men radıo arqyly tikeleı efırde kórsetildi
Jeńimpaz bıletter Leon provıntsııasy aýmaǵyndaǵy úsh aýylda, sondaı-aq Madrıdte satylǵan. Leon provıntsııasy jyl basynda bolǵan orman órtinen edáýir zardap shekken óńirlerdiń biri sanalady.
Júldeli bıletterdiń edáýir bóligin shaǵyn fýtbol klýby – La Bañeza satyp, óz óńirine birneshe mıllıon eýro tabys ákelgen.
Klýb oıynshylary bul jańalyqty aımaq úshin erekshe qýanysh dep baǵalady.
– Orman órtteri men túrli qıyndyqtardan keıin bul búkil óńir úshin úlken qýanysh, – deıdi olar.
Fýtbol klýbynyń bas bapkeri Hose Benıto da oıyn jasyrmady.
– Biz shynymen baqyttymyz jáne osy sátten kúndelikti birge eńbek etetin adamdarmen birge lázzat alyp otyrmyz, – dedi ol.
Aıta keteıik, Ispanııadaǵy Rojdestvolyq lotereıa júlde qory boıynsha álemdegi eń iri lotereıa sanalady. Onyń jalpy júlde qory 2,5 mlrd eýrodan asady. Bıyl ártúrli sanattaǵy 198 mln bılet satylymǵa shyǵarylǵan. Bir tolyq bılettiń quny 200 eýro, alaıda ony bólip satyp alýǵa bolady. Ispanııada turǵyndar bıletterdi týystarymen, áriptesterimen birigip alýdy dástúrge aınaldyrǵan.
Eske salaıyq, Ispanııada «Alısa» daýylynyń saldarynan ondaǵan úı sý astynda qaldy.
