Ispanııadaǵy poıyz apatynan qaza tapqandar sany 64-ke jetti
ASTANA. KAZINFORM — Ispanııanyń Toledo provıntsııasynda eki poıyzdyń soqtyǵysýy saldarynan qaza tapqandar sany 64 adamǵa jetti. Taǵy 80-ge jýyq jolaýshy jaraqat alǵan, olardyń 50-iniń jaǵdaıy aýyr. Bul týraly BILD agenttigi jazdy.
Qaza tapqandar sany týraly jańartylǵan málimetti Kastılııa — La-Mancha avtonomııalyq qaýymdastyǵynyń úkimet basshysy Emılıano Garsııa-Pahe málimdedi.
Onyń aıtýynsha, qutqarýshylar apattan qatty zaqymdanǵan vagondarǵa jetkennen keıin qaza tapqandar sany artqan. Іzdestirý-qutqarý jumystary áli jalǵasyp jatqandyqtan, qurbandar sany budan ári ósýi múmkin.
Apat 28 qazanda jergilikti ýaqyt boıynsha saǵat 08:54 shamasynda Toledo provıntsııasyndaǵy Ýrda qalasynyń mańynda bolǵan. Joǵary jyldamdyqty temirjol jelisinde memlekettik Renfe kompanııasynyń AVE poıyzy men jeke Iryo tasymaldaýshysyna tıesili poıyz soqtyǵysqan.
Aldyn ala málimet boıynsha, Iryo poıyzy temirjolda toqtap qalǵan. Onyń artynan kele jatqan Renfe poıyzy toqtap turǵan quramǵa soǵylǵan. Soqtyǵys saldarynan birneshe vagon relsten shyǵyp ketken.
Oqıǵa ornynda qutqarýshylar, órt sóndirýshiler men medıtsına qyzmetkerleri jumys istep jatyr. Madrıd pen Andalýsııa arasyndaǵy joǵary jyldamdyqty poıyzdardyń qozǵalysy ýaqytsha toqtatyldy.
Apattyń sebepteri anyqtalyp jatyr. Aldyn ala qarastyrylyp jatqan nusqalardyń qatarynda sıgnal berý júıesindegi aqaý men adamı faktor bar.
Eske sala keteıik, buǵan deıin Ispanııanyń Toledo provıntsııasyndaǵy joǵary jyldamdyqqa arnalǵan temirjol jelisinde eki poıyz soqtyǵysty, apat saldarynan 46 adam qaza tapqanyn jazdyq.
Qazaqstannyń Syrtqy ister mınıstrligi de oqıǵaǵa qatysty túsinikteme berdi. Vedomstvonyń qolda bar málimetine sáıkes, qaza tapqandar men zardap shekkenderdiń arasynda Qazaqstan azamattary joq. Qazirgi ýaqytta mınıstrlik aqparatty naqtylaý jumystaryn jalǵastyryp jatyr.
Qasym-Jomart Toqaev Ispanııadaǵy temirjol apatyna baılanysty kóńil aıtý jedelhatyn joldady.
