Ispanııadaǵy poıyz apaty: qaza tapqandar sany 68-ge jetti

Ispanııa premer-mınıstri Pedro Sanches eldiń qaza tapqandarǵa qaıǵyryp kóńil aıtyp jatqanyn málimdedi. Onyń aıtýynsha, qaıǵyly oqıǵanyń mán-jaıy tekserilip, zańbuzýshylyqtar anyqtalǵan jaǵdaıda bılik qajetti sharalardy qabyldaıdy.

— Eger júrdek temirjol júıesine degen senimdi qalpyna keltirý úshin qaýipsizdik sharalaryn kúsheıtý qajet bolsa, biz muny isteımiz. Ispanııa sııaqty el úshin bir jyldyń ishinde júrdek temirjolda eki apattyń bolýy — jol berýge bolmaıtyn jaǵdaı, — dedi Sanches.

Kólik mınıstri Oskar Pýenteniń málimetinshe, kompıýterlik baılanys júıesindegi aqaýǵa baılanysty qyzyl sıgnal berilip, poıyzdar qozǵalysy avtomatty túrde toqtaǵan. Alaıda keıin Renfe kompanııasynyń poıyzyn qaıta júrgizý týraly qate sheshim qabyldanǵan.

Óńirlik úkimet basshysy Emılıano Garsııa-Paheniń aıtýynsha, apattan qaza tapqandar sany 68 adamǵa jetken. Ispanııanyń densaýlyq saqtaý mınıstri Monıka Garsııa 80 adamnyń zardap shekkenin, olardyń 15-i asa aýyr jaǵdaıda jatqanyn habarlady.

Oqıǵa ornynda jedel járdem brıgadalary, qutqarýshylar men tikushaqtar jumys istedi. Keminde úsh vagon temirjol jaǵasyndaǵy eńiske qulaǵan. Vagon synyqtary betkeıge shashylyp ketken. Qutqarýshylar qarańǵy túskennen keıin de zardap shekkender men qaza tapqandardy izdeýdi jalǵastyrdy.

Jolaýshylardyń biri, 62 jastaǵy Salvador Arrısa vagon ishinde bolǵan jaǵdaıdy baıandady.

— Men esikke jaqyn jerde edim. Basqa jolaýshylar syrtqa shyǵý úshin terezelerdi syndyrdy. Keıbir adamdar oryndyqtardyń arasynda qysylyp qalyp, qozǵala almaı jatty, — dedi ol.

Óńirlik úkimet ókiliniń málimetinshe, apat kezinde Iryo poıyzynda 147 adam, al Renfe poıyzynda 397 jolaýshy bolǵan.

Taǵy bir jolaýshy Rafael Barselo soqtyǵysar aldynda kofe alý úshin ornynan turǵanyn, osynyń arqasynda qaýipten aman qalǵanyn aıtty.

— Biz tańǵy as iship, kofe iship otyrǵanbyz. Kenet qatty soqqy sezilip, bárimiz joǵary qaraı ushyp kettik, — dedi ol.

Renfe temirjol operatory zardap shekkenderdiń týystaryna arnalǵan arnaıy telefon jelisin ashty. Madrıd — Andalýsııa baǵyty boıynsha júrdek poıyzdarǵa bılet satý 13 jeltoqsanǵa deıin toqtatyldy.

Bir jyl ishindegi ekinshi iri apat

Bul — 2013 jyldan beri Eýropada bolǵan eń iri temirjol apaty. Sol jyly Ispanııanyń Santıago-de-Kompostela qalasynda poıyz relsten shyǵyp ketip, 80 adam qaza tapqan edi.

Qazirgi qaıǵyly oqıǵa Ispanııada jyl basynan beri bolǵan ekinshi iri temirjol apaty sanalady. Qańtarda dál osy baǵytta sol kompanııalar paıdalanatyn júrdek poıyzdar soqtyǵysyp, 46 adam qaza tapqan bolatyn.

Ispanııanyń Azamattyq gvardııasy aqpan aıynda jarııalaǵan aldyn ala esebinde qańtardaǵy apattyń yqtımal sebepteriniń biri retinde temirjol tósemindegi, relsterdegi nemese joldyń eki bóligin jalǵaıtyn dánekerlengen tustaǵy aqaýlardy ataǵan. Sonymen qatar tergeýshiler apattyń basqa da jeti yqtımal sebebin qarastyrǵan.

Eske salaıyq, apat 28 qazanda jergilikti ýaqyt boıynsha saǵat 08:54 shamasynda Toledo provıntsııasyndaǵy Ýrda qalasynyń mańynda bolǵan. Júrdek temirjol jelisinde memlekettik Renfe kompanııasynyń AVE poıyzy men jeke Iryo tasymaldaýshysynyń poıyzy soqtyǵysqan.

Aldyn ala málimet boıynsha, Iryo poıyzy temirjolda toqtap qalǵan. Onyń artynan kele jatqan Renfe poıyzy oǵan soqtyǵysqan. Soqtyǵys saldarynan birneshe vagon relsten shyǵyp ketken.

Oqıǵa ornynda qutqarýshylar, órt sóndirýshiler men medıtsına qyzmetkerleri jumysyn jalǵastyryp jatyr. Madrıd pen Andalýsııa arasyndaǵy júrdek poıyzdardyń qozǵalysy toqtatyldy.

Apattyń sebepteri anyqtalyp jatyr. Aldyn ala qarastyrylyp jatqan nusqalardyń qatarynda sıgnal berý júıesindegi aqaý men adamı faktor bar.

Buǵan deıin Ispanııada poıyzdar soqtyǵysqan apattan qaza tapqandar sany 64-ke jetkeni habarlanǵan bolatyn.

Qazaqstan Syrtqy ister mınıstrligi qolda bar málimet boıynsha, qaza tapqandar men zardap shekkenderdiń arasynda Qazaqstan azamattary joq ekenin naqtylaǵan. Vedomstvo aqparatty tekserýdi jalǵastyryp jatyr.

Qazaqstan Prezıdenti Ispanııadaǵy qaıǵyly oqıǵaǵa baılanysty kóńil aıtty.