Ispanııadaǵy órt: 115 myń gektar aýmaq otqa orandy

ASTANA. KAZINFORM — Ispanııadaǵy orman órtinen 115 myń gektardan astam jer órtenip, myńdaǵan adam evakýatsııalandy, birneshe adam qaza tapty.

Eń kóp zardap shekken aımaq eldiń soltústik-batysyndaǵy Kastılııa men Leon avtonomııalyq aımaǵy. Zamora, Leon, Salamanka jáne Avıla qalalarynda 28 belsendi órt oshaǵy tirkeldi. Galısııada 14 órt jalǵasyp jatyr, Oýrense provıntsııasynda 58 myń gektardan astam aýmaq órtendi.

Astýrııa men Ekstremadýrada da órt órship tur. Al Djarılladaǵy órt erekshe qaýipti, onda 11 myń gektar jer órtendi, taǵy jeti órt oshaǵy órship tur.

Premer-mınıstr Pedro Sanches osy jeksenbide Oýrense men Leondaǵy orman órtterinen zardap shekken aımaqtarǵa bardy, onda ol tótenshe jaǵdaılar jáne úılestirý bólimsheleriniń basshylarymen de kezdesti.

Órt Madrıd pen Galısııa arasyndaǵy joǵary jyldamdyqty joldy kesip tastady. Qurban bolǵandar bar: Leondaǵy orman órti kezinde órt sóndirý mashınasy aýdarylyp, bir adam qaza taýyp, bir adam jaraqat aldy.

Ispanııa úkimetiniń basshysy órtti klımattyń ózgerýimen baılanystyrady.

— Klımattyq tótenshe jaǵdaıdyń saldary barǵan saıyn aýyrlap, órtti jedeldetip, otandastarymyzdyń ómirine kóbirek áser etip jatqany týraly ǵylymı dálelder bar, — dedi ol.

Sondaı-aq, ol órt qoıýshylarǵa qatań jaza qoldanylatynyna ýáde berdi. Órt qoıýǵa qatysy bar kúdiktiler qazirdiń ózinde qamaýǵa alyndy.

Ispanııa sonymen qatar Slovakııa, Frantsııa, Italııa jáne Germanııa bıligine kórsetken kómekteri úshin alǵysyn bildirdi.

Kórshi Portýgalııada jeksenbi kúnnen beri 3200-den astam órt sóndirýshi toǵyz iri órtpen kúresip jatyr. Órttiń basym bóligi Arganıl jáne Satan qalalarynda shoǵyrlanǵan.

Shilde aıynan beri materıktik Portýgalııada da orman órti tirkeldi, ásirese soltústik jáne ortalyq aımaqtar zardap shekti.

Aldyn ala málimet boıynsha, Portýgalııada 139 myń gektar jer órtenip ketken. Bul 2024 jyldyń sáıkes kezeńimen salystyrǵanda 17 ese kóp.

Juma kúni Portýgalııa úkimeti Eýropalyq Odaqtyń azamattyq qorǵanys mehanızminen kómek surady. Portýgalııalyq BAQ eldegi órtti sóndirý jumystaryn kúsheıtý úshin dúısenbide eki Fire Boss ushaǵy keledi dep habarlaıdy.

Osyǵan deıin habarlanǵandaı, AQSh pen Qytaı energetıka salasyndaǵy klımatty lastaýdy azaıtý máselesinde oryndarymen aýysqany belgili boldy. Carbon Monitor málimetteri boıynsha, 2025 jyldyń birinshi jartysynda Qytaıda kómirqyshqyl gazynyń shyǵaryndylary 2,7%-ǵa azaıǵan, al AQSh-ta bul kórsetkish 4,2%-ǵa artqan.