Ispanııadaǵy orman órti aýyl sharýashylyǵyna 600 mln eýro shyǵyn keltirdi

ASTANA.KAZINFORM — Ispanııada orman órtteri aýyl sharýashylyǵyna 600 mln eýro kóleminde zııan keltirdi, dep habarlaıdy Kazinform tilshisi. 

Eń kóp zardap shekken salalar ekstensıvti mal sharýashylyǵy men omartashylyq. Janýarlar birneshe aı boıy azyqsyz qalsa, omarta sharýashylyǵynda keminde 10 myń omarta joıylǵan. Sarapshylardyń aıtýynsha, olardy jaqyn arada qalpyna keltirý múmkin bolmaıdy.

— Myńdaǵan gektar jaıylym órtenip ketti. Bul aldaǵy aılarda jer qaıta qalpyna kelgenshe malǵa qosymsha jem-shóp qajet bolady degen sóz, — deıdi fermer Haver Fatas.

Órt saldary ásirese Galısııa men Leon aımaqtaryndaǵy iri qara malǵa, al Samora, Salamanka jáne Kaseres óńirlerindegi qoı, eshki jáne toqty sharýashylyǵyna aýyr tıip otyr.

Fermerler ákimshiliktiń qoldaýynsyz shyǵyndardy óteý múmkin emes ekenin aıtyp, alańdaýshylyq bildirýde. Kóptegen qojalyqtar jabylý aldynda tur, sebebi qart fermerler bul jaǵdaıdan keıin maldy satyp jiberýdi jón kórýi yqtımal.

Sarapshylardyń aıtýynsha, bul jaǵdaı Ispanııadaǵy aýyldyq aımaqtardyń qańyrap bos qalýyna ákelýi múmkin. Órttiń jıi qaıtalanýy men halyq sanynyń azaıýy aýyl ómirin odan saıyn kúrdelendirip otyr.

Aıta keteıik, Ispanııada ótken aptada birden birneshe iri órt tirkeldi. Tamyz aıynyń basynan beri elde 115 myń gektardan astam jer órtenip ketken.