Ispanııadaǵy orman órti 50 myń gektardan astam aýmaqty sharpydy
ASTANA. KAZINFORM – Ispanııada sońǵy jyldardaǵy eń aýyr orman órti maýsymdarynyń biri jalǵasyp jatyr. Elde tilsiz jaý 50 myń gektardan astam aýmaqty sharpydy, dep habarlaıdy Euronews.
Qazir órtpen kúres negizinen eldiń soltústik-shyǵysy men ortalyq bóligindegi eń qaýipti eki oshaqta – Gvadalahara provıntsııasyndaǵy La-Merla mýnıtsıpalıteti men Saragosa provıntsııasyndaǵy Ores aýdanynda júrgizilip jatyr. Bıliktiń baǵalaýynsha, bul órtter bıylǵy jyldyń basynan bergi eń iri tabıǵı apattardyń qataryna engen.
Beısenbi kúni bastalǵan La-Merladaǵy órt qazirdiń ózinde shamamen 9,9 myń gektar aýmaqty qamtydy. Jeksenbige qaraǵan túni órt sóndirýshiler Gaskýenıa-de-Bornova aýdanyndaǵy ońtústik ýchaskede jalynmen kúresti kúsheıtti. Sonymen qatar Navas-de-Hadrake men Býstares eldi mekenderine órttiń taralýyn tejeý jumystary júrgizildi.
– Jalynnyń odan ári taralý qaýpine baılanysty bılik Belenıa sý qoımasynyń mańyndaǵy eldi mekenderdi qosa alǵanda, 16 aýyldyń turǵyndaryn evakýatsııalady, – dep habarlady óńirlik bılik.
Kastılııa–La-Mancha úkimetiniń málimetinshe, qatty jeldiń áserinen órt óte joǵary qarqynmen taralyp jatyr. Jalynnyń taralý jyldamdyǵy mınýtyna 60 metrden asady. Bul orman órtiniń baqylaýǵa qıyn sanalatyn shekten áldeqaıda joǵary kórsetkish.
Qazir Ispanııanyń Azamattyq gvardııasy órttiń shyǵý sebepterin anyqtap jatyr. Aldyn ala boljam boıynsha, tilsiz jaý astyq jınaıtyn kombaın júrgizgen aýyl sharýashylyǵy jumystary kezinde tutanýy múmkin.
Sonymen qatar Saragosa provıntsııasyndaǵy Ores mańyndaǵy órt 15,4 myń gektardan astam aýmaqty sharpyǵan. Órt sóndirý qyzmetiniń málimetinshe, ótken túni jalynmen kúres sátti júrgizilip, tańerteń áýe jáne jerústi kúshteri qosymsha tartyldy.
Qazir Ores, Asın, Lýesııa, Malpıka-de-Arba jáne Ýnkastılo eldi mekenderinde evakýatsııalaý týraly buıryq kúshinde. Al Sos-del-Reı-Katolıko, Navardýn, Ýrrıes jáne Kastılıskar mýnıtsıpalıtetterinde joǵary daıyndyq rejımi engizildi.
Órtti sóndirý jumystaryna shamamen 450 órt sóndirýshi men tótenshe jaǵdaılar qyzmetiniń mamandary jumyldyrylǵan. Olar jeldiń baǵyty men jyldamdyǵyn úzdiksiz baqylap, jańa órt oshaqtarynyń paıda bolýyna jol bermeýge, jaqyn mańdaǵy eldi mekender men Serra-de-Santo-Domıngo tabıǵı qoryq aýmaǵyn qorǵaýǵa kúsh salyp jatyr.
Aıta keteıik, Ispanııada aldaǵy aptada aýa temperatýrasy +45 gradýsqa deıin kóteriledi.
