Ispanııadaǵy Kosta-Brava jaǵalaýynda iri orman órti 750 gektar aýmaqty sharpydy
ASTANA. KAZINFORM – Ispanııanyń Jırona provıntsııasyndaǵy Kosta-Brava jaǵalaýynda shyqqan iri orman órti 750 gektar aýmaqty sharpyp, shamamen 12 myń turǵynǵa úılerinen shyqpaý týraly nusqaý berildi, dep habarlaıdy Euronews.
Órt Katalonııanyń La-Bısbal-d'Emporda mýnıtsıpalıtetinde bastalyp, qatty tramontana jeliniń áserinen tez taralǵan. Orman qyzmetiniń aldyn ala málimetinshe, tilsiz jaýǵa jol jóndeý kezinde paıdalanylǵan mehanıkalandyrylǵan tehnıkanyń ushqyny sebep bolýy múmkin.
Katalonııa úkimeti órtti sóndirýge áskerı tótenshe jaǵdaılar bólimin (UME) jumyldyrýǵa ótinish berdi. Óńir basshysy Salvador Ilıa turǵyndardy bılik nusqaýlaryn qatań saqtaýǵa shaqyrdy.
Qalyń tútinge baılanysty birneshe eldi mekende oqshaýlaý rejımi engizildi. Sonymen qatar qaýipti aımaqtaǵy 40 myńǵa jýyq turǵynnyń uıaly telefonyna Es-Alert júıesi arqyly eskertý habarlamasy jiberilgen.
Órt aýmaǵynda ornalasqan demalys lagerindegi 150 bala qaýipsiz jerde ekeni habarlandy. Sondaı-aq Jırona provıntsııasynyń Vılavenýt aýdanynda taǵy bir orman órti tirkelip, eki eldi meken turǵyndaryna da oqshaýlaý rejımi engizildi.
Órtti sóndirýge 50-den astam tehnıka, onyń ishinde 11 áýe kemesi jumyldyryldy. Vılavenýttaǵy órtti aýyzdyqtaýǵa úsh áýe tehnıkasy, 17 jerústi bólimshesi jáne arnaıy tehnıkalar qatysyp jatyr.
Órt saldarynan birneshe avtojol ýaqytsha jabyldy. Áleýmettik jelilerde turǵyndar men kýágerler órttiń sýretteri men beınejazbalaryn jarııalap, qutqarýshylarǵa qoldaý bildirýde.
Aıta keteıik, Frantsııanyń ońtústiginde orman órti órshidi.
