Ispanııadaǵy birneshe ondaǵan adamnyń ómirin qıǵan poıyz apatyna ne sebep bolýy múmkin
ASTANA. KAZINFORM — Ispanııada keminde 69 adamnyń ómirin qıyp, 200-den astam adamdy jaralaǵan eki júrdek poıyzdyń soqtyǵysýyna LZB avtomatty qaýipsizdik júıesindegi aqaý sebep bolýy múmkin. Tergeýshiler apattyń mán-jaıyn anyqtap jatyr, dep habarlaıdy Kazinform agenttigi Bild basylymyna silteme jasap.
Aldyn ala málimet boıynsha, memlekettik Renfe kompanııasynyń poıyzy saǵatyna 160-200 shaqyrym jyldamdyqpen kele jatyp, relste turǵan jeke Iryo operatorynyń quramyna soǵylǵan.
Tergeýshiler apattyń yqtımal sebepteriniń biri retinde Germanııa temirjoldarynda da qoldanylatyn LZB avtomatty qaýipsizdik júıesindegi aqaýdy qarastyryp jatyr.
El Mundo gazetiniń málimetinshe, apat bolǵan kúni tańerteń uzyndyǵy shamamen 63 shaqyrym ýchaskede LZB júıesi isten shyqqan. Sonyń saldarynan birneshe poıyz toqtap qalǵan. Osydan keıin poıyzdardyń qozǵalysyn basqarý Madrıdtegi dıspetcherlik ortalyqqa berilgen.
Tergeý nusqasyna sáıkes, saǵat 8:36–da dıspetcher Renfe poıyzynyń mashınısine júıeni qaıta iske qosyp, balama qaýipsizdik tetigin paıdalanyp qozǵalysty jalǵastyrýdy tapsyrǵan.
Al Iryo poıyzy aqaý áli joıylmaǵandyqtan ornynan qozǵalmaǵan. Saǵat 8:53–te eki poıyz soqtyǵysqan.
Endi tergeýshiler apatqa naqty ne sebep bolǵanyn anyqtaýy kerek. Olardyń qarastyryp otyrǵan nusqalarynyń qatarynda tehnıkalyq aqaý, dıspetcherdiń qateligi nemese birneshe faktordyń qatar áser etýi bar.
Eske salaıyq, apat 28 qazanda jergilikti ýaqyt boıynsha tańǵy saǵat 8:54 shamasynda Madrıdten ońtústikke qaraı shamamen 130 shaqyrym jerdegi Ýrda eldi mekeniniń mańynda bolǵan. Soqtyǵysqan poıyzdar — Renfe kompanııasynyń AVE poıyzy men jeke Iryo operatorynyń quramy. Ekeýi de Madrıd — Sevılıa baǵytymen júrgen. Aldyn ala málimet boıynsha, Renfe poıyzy toqtap turǵan nemese jyldamdyǵyn báseńdetken Iryo quramyna artynan soǵylǵan.
29 qazanda Ispanııada poıyz apatynan kóp adamnyń qaza tabýyna baılanysty úsh kúndik aza tutý jarııalandy.
Aıta keteıik, bul — Ispanııada 1970 jyldardan bergi adam shyǵyny boıynsha úshinshi iri temirjol apaty. Buǵan qosa, 2026 jyly elde bolǵan ekinshi iri poıyz apaty sanalady. Qańtarda Adamýs mýnıtsıpalıtetiniń mańynda Malagadan Madrıdke bet alǵan júrdek poıyz relsten shyǵyp, qarsy baǵytta kele jatqan qurammen soqtyǵysqan. Soqtyǵys saldarynan ekinshi poıyz da relsten shyǵyp ketken. Apattan 46 adam qaza taýyp, ondaǵan adam jaralanǵan.
Syrtqy ister mınıstrligi Ispanııadaǵy temirjol apatynda qaza tapqandardyń arasynda Qazaqstan azamattary joq ekenin málimdedi.
