Ispanııada jeke derekterdi jarııa etkeni úshin aıyptalǵan bas prokýror tergeýge alyndy

ASTANA. KAZINFORM — Ispanııadaǵy prokýrorlar qaýymdastyqtary eldiń bas prokýrory Alvaro Garsıa Ortısten otstavkaǵa ketýin talap etip jatyr, dep jazdy AZƏRTAC.

Bul talap oǵan osy aptada qupııa aqparatty jarııalady degen resmı aıyptaýdan keıin qoıylyp otyr. Bul aqparat oppozıtsııa jetekshisiniń áriptesine qatysty is materıalynan alynǵan.

AZƏRTAC habarlaýynsha, Garsıa Ortıs 2022 jyldyń tamyzynan bastap Ispanııanyń bas prokýratýrasyn basqaryp keledi. Alaıda maýsym aıynyń basynan beri ol tergeýge alynǵan, óıtkeni ol jýrnalısterge bıznesmen Alberto Gonsales Amadorǵa qatysty tergeý materıaldaryndaǵy jeke hat almasý derekterin bergen degen kúdikke ilingen. Amador — Madrıdtegi Halyq partııasynyń jetekshisi Izabel Dıas Aıýsonyń seriktesi. Oǵan salyq tóleýden jaltarý sondaı-aq qujattardy qoldan jasaý baptary boıynsha aıyp taǵylýy múmkin.

Prokýrorlar qaýymdastyǵynyń prezıdenti Krıstına Dekseıýs Euractiv agenttigine:

— Garsıa Ortıs otstavkaǵa ketip, ózin jaı azamat retinde qorǵaýy kerek. Qyzmetinde qalýy prokýratýranyń bedeline eleýli zııan keltiredi, — dedi.

Ispanııanyń Táýelsiz prokýrorlar qaýymdastyǵy (APIF) eldiń Joǵarǵy sotynan Garsıa Ortısti ýaqytsha qyzmetinen shettetýin resmı túrde surady. Joǵarǵy sot bul suranysqa baılanysty Bas prokýratýranyń pikirin suratqanyn Servimedia habarlady.

Sonymen qatar, Garsıa Ortıs buryn múshe bolǵan progressıvti prokýrorlar qaýymdastyǵy (UPF) málimdeme jasap, oǵan taǵylǵan aıyppen «batyl kelispeıtinin» bildirdi.

Buǵan deıin habarlanǵandaı, Ispanııanyń Barselona qalasy bıligi men jergilikti porttyń basshylyǵy 2030 jyly krýızdik termınaldar sanyn 7-den 5-ke deıin qysqartý týraly sheshim qabyldaǵan.