Ispanııada jaz bastalmaı turyp, aptap ystyqtan qaıtys bolǵandardyń sany kóbeıdi
ASTANA. KAZINFORM — Ispanııada mamyr aıynda aptap ystyqtyń saldarynan 101 adam qaıtys boldy. Bul — kóktemniń sońǵy aıy úshin sońǵy 10 jyldan astam ýaqyt ishinde tirkelgen eń joǵary kórsetkish, dep habarlaıdy DW.
Bul týraly eldiń densaýlyq saqtaý mınıstrligi habarlady.
Vedomstvonyń málimetinshe, qaza tapqandar sany sońǵy on jyldaǵy mamyr aıynyń ortasha kórsetkishinen 3,6 ese joǵary bolǵan. Bılik ókilderi ólim-jitimniń artýyn jaz maýsymy resmı bastalmaı turyp-aq eldi qamtyǵan erekshe joǵary temperatýra kezeńderimen baılanystyrdy.
Esepter Momo ólim-jitim monıtorıngi júıesiniń derekterine negizdelgen. Ol kún saıyn el boıynsha qaıtys bolǵandardyń sanyn tirkeıdi jáne bul sandardy uzaq merzimdi statıstıka negizinde eseptelgen boljamdy ólim-jitim deńgeıimen salystyrady.
Buǵan deıin Ispanııanyń ulttyq meteorologııalyq agenttigi (Aemet) birqatar qalada rekordty temperatýra tirkelgenin habarlaǵan. Ásirese eldiń soltústik óńirlerinde mamyr aıy úshin ádetten tys joǵary temperatýra baıqalǵan.
Aıta keteıik, BUU aldaǵy aptalarda El-Nıno kúsheıetinin eskertti. Bul klımattyq qubylys álemde jańa temperatýra rekordtaryna, qurǵaqshylyqqa, sý tasqynyna jáne orman órtterine ákelýi múmkin.
