Ispanııada jasyl tústi kúshikter dúnıege keldi
ASTANA. QazAqparat - Ispanııada jasyl tústi kúshikter týdy, dep habarlady sheteldik BAQ. Jergilikti mamandar mundaı jaǵdaıdyń osyǵan deıin kezdespegenin aıtyp otyr.
Ispanııanyń Valıadolıd aımaǵynda turatyn ıttiń ıeleri jasyl kúshikterdiń týǵanyn kórgende qatty tań qalǵan. Olar kishkentaı ári álsiz bolǵan. Tipti bireýi ólip qalǵan. Al ekinshisi bolsa túsin ózgerte bastaǵan. Mamandar tájirıbede mundaı jaǵdaıdyń bolmaǵanyn aıtqanymen, bul jasyl tústi kúshikterdiń birinshi ret paıda bolýy emes. 2012 jyly brıtanııalyq buqaralyq aqparat quraldary jasyl tústi labrador kúshiginiń týǵanyn habarlaǵan bolatyn. Biraq on kún ótken soń ıttiń túsi ózgergen. Ǵalymdar tústiń bulaı ózgerýine platsentte bolatyn zat sebep bolýy múmkin dep sanaıdy, dep jazady Ýtro.rý.
