Ispanııada jastar jalaqysynyń 98%-y páteraqyǵa ketedi
ASTANA. KAZINFORM – Ispanııada jastardyń jeke turǵyn úı jaldaýǵa jumsaıtyn shyǵyny ortasha jalaqysynyń 98,7%-yna jetken, dep habarlaıdy Euronews.
Ispanııa Jastar keńesiniń (CJE) Táýelsiz ómir súrý observatorııasy jarııalaǵan esepke sáıkes, 2025 jyly 16-29 jas aralyǵyndaǵy jastardyń ata-anasynan bólek turý deńgeıi 14,5%-ǵa deıin tómendegen. Bul – statıstıka júrgizile bastaǵaly bergi eń tómen kórsetkish.
Zertteýde jumys isteıtin jas azamattyń Ispanııada jalǵyz ózi baspana jaldaý úshin taza tabysynyń derlik bárin jumsaýyna týra keletini aıtylǵan.
Qazirgi tańda jastardyń óz betinshe ómir súrýiniń ortasha jasy 30-dan asqan.
Ispanııa Jastar keńesiniń tóraıymy Andrea Henrı jastar úshin ata-anasynan bólek shyǵý kedeılenýmen teń bolyp bara jatqanyn málimdedi.
– Eńbek naryǵy men turǵyn úı naryǵy jastarmen bir tilde sóılesýdi toqtatty, – dedi ol.
Observatorııa derekterine sáıkes, Ispanııadaǵy jastardyń ortasha taza aılyǵy shamamen 1190 eýrony quraıdy. Al turǵyn úıdi jaldaýdyń ortasha quny 1176 eýroǵa jetken.
Uıym ókilderi baspana máselesi urpaqtar arasyndaǵy teńsizdiktiń basty faktorlarynyń birine aınalǵanyn atap ótti.
Esepte másele tek jumyssyz jastarǵa emes, turaqty jumysy bar azamattarǵa da áser etip otyrǵany aıtylǵan.
– Qazir jastardyń edáýir bóligi jumys istese de, turaqsyzdyqqa, shamadan tys qaryzǵa nemese otbasyǵa táýeldilikke tap bolmaı, derbes ómir qura almaıdy, – delingen baıandamada.
Sarapshylardyń aıtýynsha, turǵyn úı baǵasynyń ósýi jastardy bólme jaldaýǵa nemese ortaq páterde turýǵa májbúrlep otyr. Alaıda mundaı formattyń ózi qoljetimdi bolmaı barady.
Ortaq páterde turý shyǵyny da jastar jalaqysynyń orta eseppen 33,6%-yn quraıdy.
Sondaı-aq baıandamada jastardyń ata-anasynan bólek shyǵýy kóbine otbasynyń qarjylyq qoldaýyna táýeldi ekeni atap ótilgen.
Ispanııa Jastar keńesi bılikti qoljetimdi turǵyn úı qoryn kóbeıtýge jáne jastardyń laıyqty baspanaǵa qol jetkizýin jeńildetýge shaqyrdy.
– Bul másele qurylymdyq sıpat alyp, tutas bir býyn úshin aýyr saldarǵa ákelip jatyr, – dep eskertti uıym ókilderi.
Aıta keteıik, byltyr Eýroodaq basshylary sammıtinde alǵash ret baspana daǵdarysy talqylanady.
