Ispanııada jappaı narazylyqqa sebepshi bolǵan 87 jastaǵy keıýana qaıtys boldy
ASTANA. KAZINFORM — Ispanııada páterinen qýylýy jappaı narazylyq aktsııalaryna sebepshi bolǵan Madrıd turǵyny Marıkarmen Abaskal 87 jasynda aýrýhanada qaıtys boldy. Bul týraly Madrıdtiń páter jaldaýshylar odaǵy habarlady, dep habarlaıdy Kazinform DW-ge silteme jasap.
23 qyrkúıek kúni egde jastaǵy áıel Ispanııa astanasynyń Retıro aýdanyndaǵy páterinen qýyldy. Ol páterdi 1956 jyldan beri jalǵa alyp kelgen. Páterdi Urbagestión kompanııasy satyp alǵannan keıin aılyq jaldaý aqysy 500 eýrodan 2650 eýroǵa deıin ósip, artynsha 1650 eýroǵa turaqtanǵan.
Uzaq daýdan keıin sot Abaskaldyń páterinen shyǵarylýyn zańdy dep tapqan, alaıda zeınetkerdiń úıiniń aınalasyna jurtshylyq ókilderi jınalyp, narazylyq bildirgen. Polıtsııa narazylyq bildirýshilerdi taratyp, jedel járdem Marıkarmen Abaskaldy emhanaǵa alyp ketken. Sol kezde onyń densaýlyǵy qalypty ekeni habarlanǵan.
Degenmen bul oqıǵa Ispanııada Abaskaldy qoldaý úshin jappaı narazylyq aktsııalaryn týdyrdy, 28 qyrkúıekte zeınetkerdiń advokaty Beatrıs Dýro úı ıesimen aldyn ala kelisimge qol jetkizilgenin, Marıkarmen segiz jyldyq jańa kelisimshart negizinde páterine oralatynyn, jaldaý aqysy onyń zeınetaqysynyń 30%-yna jeter-jetpes, ıaǵnı aıyna shamamen 460-500 eýro bolatynyn habarlady. Kelisimge zeınetker aýrýhanadan shyqqannan keıin ózi qol qoıýy kerek edi. Biraq narazylyq búkil eldi sharpyp úlgerdi.
Narazylyqtar men turǵyn úı reformasynyń sátsizdigi kezekten tys parlament saılaýyn ótkizýge sebep boldy
5 qazanda premer-mınıstr, sotsıalıst Pedro Sanches parlamentti taratyp, 2026 jyldyń 29 qarashasynda kezekten tys saılaý ótkizý týraly jarııalady. Ol óz sheshimin úkimettiń turǵyn úı naryǵyn reformalaý jobasyn parlamenttiń keri qaıtarýymen baılanysty dep túsindirdi.
Parlament taratylǵannan keıin, 6 qazanda Ispanııa mınıstrler kabıneti parlamenttiń qarsylyǵyna qaramastan, buryn bekitilgen turǵyn úı zańnamasyn engizý týraly sheshim qabyldady. Sanches parlament músheleri endi zańǵa tosqaýyl bola almaıtynyn aıtyp, parlament «halyq muqtajynan keri aınalǵany» úshin merziminen buryn taratylǵanyn málimdedi.
Jańa turǵyn úı zańyna sáıkes, qoljetimdi áleýmettik turǵyn úı qurylysyna bıýdjetten júzdegen mıllıon eýro bólinedi, jalǵa alýshylardy páterinen májbúrlep shyǵarýǵa 2030 jylǵa deıin tyıym salady jáne iri turǵyn úı kompanııalaryna úsh jyl boıy páter satyp alýǵa tyıym salady. Budan tys, uzaq merzimge jalǵa berý naryǵyn yntalandyrý úshin týrısterge jalǵa beriletin páterlerge salynatyn salyqtar artady.
Kommýnaldy páterlerde bólme jaldaý quny sol páterdi bir adamǵa jalǵa berý qunynan aspaýy kerek. Zań jobasynda tabysy tómen jalǵa alýshylarǵa salyq jeńildikteri ýáde etiledi jáne bos jatqan jeke páterlerge salyq kúrt artdy. Sondaı-aq, jalǵa alýshylarǵa kelisimshartty avtomatty túrde jańartý quqyǵy beriledi, bul olarǵa páterdi ıesiniń qalaýyna qaramastan, ómir boıy jaldaýǵa múmkindik beredi.
Ońshyl oppozıtsııa Sanchestiń usynǵan reformasyn da, ony parlamenttiń maquldaýynsyz qabyldaý týraly sheshimin de synǵa aldy.
