Ispanııada jappaı narazylyq: halyq bılikten qoljetimdi baspana talap etti
ASTANA. KAZINFORM — Senbi kúni Ispanııanyń ondaǵan qalasynda bılikten halyqqa qoljetimdi baspana máselesin sheshýdi talap etken jappaı narazylyq aktsııalary ótti, dep habarlaıdy Kazinform-nyń Eýropalyq odaqtaǵy menshikti tilshisi.
Narazylyq Ispanııa parlamenti jalǵa alýshylardy qorǵaýǵa baǵyttalǵan úkimettiń eki qaýlysyn qabyldamaı tastaǵannan keıingi kúni uıymdastyryldy. Osy jaǵdaıdan keıin Ispanııa premer-mınıstri Pedro Sanches merziminen buryn parlamenttik saılaý ótkizý múmkindigin qarastyryp jatqany týraly aqparat tarady.
Eń iri sherý Madrıdte ótti. Narazylyq bildirýshilerdiń tórt sherýi Sıbeles alańynda toǵysty. Aktsııany uıymdastyrǵan Jalǵa alýshylar odaǵynyń málimetinshe, el astanasyndaǵy sherýge shamamen 500 myń adam qatysqan. Al bılik ókilderi qatysýshylar sanyn 70 myń dep baǵalady.
Narazylyq aktsııalary Barselona, Valensııa, Saragosa jáne Malaga sııaqty Ispanııanyń taǵy shamamen 50 qalasynda ótti. Kóptegen eldi mekende aktsııalar beıbit sıpatta boldy. Tek Valensııada polıtsııa men sherýge qatysýshylar arasynda qaqtyǵys bolyp, tártip saqshylary rezeńke oq pen kózden jas aǵyzatyn gaz qoldandy. Birneshe adam ustaldy.
Bul aktsııalar bıyl 23 qyrkúıekte Madrıdtiń Retıro aýdanynda 87 jastaǵy Marıkarmen Abaskaldiń páterinen májbúrli túrde shyǵarylýynan keıin bastalǵan narazylyqtardyń jalǵasy boldy.
Abaskaldiń otbasy bul baspanany 1956 jyldan beri jalǵa alyp kelgen. Páterdi ınvestıtsııalyq kompanııa satyp alǵannan keıin jaldaý aqysy kúrt ósken. Múgedektigi bar zeınetkerdi úıden zembilmen alyp shyqqan. Bul jaǵdaı qoǵamda úlken rezonans týǵyzdy.
Pýerta-del-Sol alańynda bir aptadan astam ýaqyttan beri narazylyq bildirýshilerdiń shatyrly lageri jumys istep tur. Uıymdastyrýshylardyń málimetinshe, onda 1 200-den astam shatyr tigilgen. Narazylyq bildirýshiler Abaskaldi qoldap, eldegi qoljetimdi baspana saıasatyn qaıta qaraýdy talap etip otyr.
Juma kúni Ispanııa parlamenti úkimet usynǵan turǵyn úıge qatysty eki koroldik dekretti qabyldamaı tastady. Qujattar áleýmettik turǵydan osal jalǵa alýshylardy 2030 jylǵa deıin úıden shyǵarýdan qorǵaýdy, jaldaý kelisimsharttarynyń bir bóligin uzartýdy, qysqa merzimdi jáne bólme boıynsha jalǵa berý talaptaryn qatańdatýdy, sondaı-aq «alypsatarlyq qorlar» dep atalatyn ınvestıtsııalyq qorlardyń qyzmetine shekteý engizýdi kózdegen.
Birinshi qujat 178 depýtattyń qarsy, 172 depýtattyń qoldaý daýysynan keıin qabyldanbady. Ekinshi qujatqa 184 depýtat qarsy bolyp, 166 depýtat qoldady. Oǵan oppozıtsııalyq Halyq partııasy, ońshyl Vox jáne katalondyq Junts partııasy qarsy daýys berdi.
Premer-mınıstr Pedro Sanches bastaǵan Sotsıalıstik partııa men Sumar blogynan turatyn koalıtsııa parlamentte kópshilikke ıe emes.
Daýys berýden keıin Halyq partııasynyń jetekshisi Alberto Nýnes Feıhoo premer-mınıstrdi «múmkindiginshe tezirek» saılaý ótkizýge shaqyrdy. Onyń aıtýynsha, qazirgi úkimettiń parlamentte de, qoǵamda da jetkilikti qoldaýy joq.
Ispanııada kezekti jalpyulttyq saılaý 2027 jyly ótýi tıis. Ispanııalyq BAQ-tyń málimetinshe, Sanchestiń aınalasyndaǵylar qarasha aıynda merziminen buryn saılaý ótkizý múmkindigin joqqa shyǵarmaıdy. Aqparat kózderiniń aıtýynsha, premer-mınıstr bul sheshimdi senbidegi narazylyqtardyń aýqymyn baǵalaǵannan keıin qabyldaýy múmkin.
Narazylyqty uıymdastyrýshylar keltirgen esep boıynsha, Ispanııada jaldaý aqysy sońǵy on jylda shamamen 90 paıyzǵa ósken. Sherýge qatysýshylar jaldaý qunyn tómendetýdi, turǵyndardy úıden shyǵarýǵa moratorıı engizýdi jáne ınvestıtsııalyq qorlardyń turǵyn úıdi jappaı satyp alýyna shekteý qoıýdy talap etedi. Keıbir qoǵamdyq uıymdar turǵyn úı máselesine baılanysty jalpyulttyq ereýil ótkizýge shaqyryp otyr.
Budan buryn Madrıdte 87 jastaǵy Marıkarmen Abaskal 70 jyldan astam ýaqyt turǵan páterinen qýylǵannan keıin Ispanııada týyndaǵan jappaı narazylyq týyndap, el úkimeti turǵyn úı naryǵyndaǵy daǵdarysty retteýdiń josparyn ázirlegenin jazǵanbyz.
