Ispanııada janartaýdan atqylaǵan lava 600-ge jýyq ǵımaratty qıratty
MADRID. QazAqparat – Ispanııanyń Palma aralynda (Kanar araldarynyń avtonomdy qaýymdastyǵy) janartaýdan atqylaǵan lava aǵyndary qazirdiń ózinde 600-ge jýyq ǵımaratty qıratty. Bul týraly seısenbide Kanar araldarynyń Výlkanologııalyq ınstıtýty ózderiniń Twitter paraqshasynda jazdy, dep habarlaıdy QazAqparat.
«589 ǵımarat qırady, 258 ga aýmaqty lava aǵyndary jaýyp qaldy, 21 km jol búlindi», - delingen habarlamada.
19 qyrkúıekte El-Paso eldi mekeni aýmaǵynda Palmada janartaý atqylaı bastaǵan. Qaýipsizdik maqsatynda 6 myńnan astam adam evakýatsııalandy. Ázirge eshkim zardap shekken joq.
Qazir bılik lava aǵyndarynyń Palma jaǵalaýyna jetýin kútýde. Ázirge ol jaǵalaýdan 800-den 1000 metrge deıingi qashyqtyqta.
Jergilikti telearnalar kadrlarynan lava aǵyndarynyń muhıtqa qaraı qalaı baıaý qozǵalyp bara jatqanyn kórýge bolady. Janartaý kraterinen asa úlken tútin baǵanasy kóterilýde.
