Ispanııada týrısterdi lıýks saǵat ańdyǵan qylmystyq top tonaǵan
ASTANA. KAZINFORM – Ispanııa polıtsııasy ıtalııalyq quqyq qorǵaý organdarymen jáne Europol-men birlesip, týrısterdiń qymbat saǵattaryn urlaýǵa mamandanǵan qylmystyq jelige qarsy operatsııa júrgizdi, dep habarlaıdy Euronews.
Neapoldegi reıdter kezinde Ispanııanyń tanymal kýrorttarynda áreket etken qylmystyq toptyń 12 kúdikti múshesi ustaldy.
Tergeý málimetinshe, qylmyskerler jyldam ári qatygez kóshe tonaýlaryna mamandanǵan «paranzas» dep atalatyn neapoldik bandalardyń quramyna kirgen. Olardyń negizgi nysanasy Marbelıa, Barselona, Malaga, Ibıtsa jáne Palma-de-Maıorkadaǵy lıýks saǵat ıeleri bolǵan.
Tergeý barysynda kúdiktilerdiń Ispanııaǵa saparlaryn muqııat josparlaǵany anyqtaldy. Olar jalǵan qujattardy paıdalanyp, logıstıkany aldyn ala uıymdastyrǵan. Qozǵalý úshin Italııadan jetkizilgen kólikterdi nemese jalǵa alynǵan avtokólikterdi qoldanǵan.
Qylmyskerler qurbandaryn qymbat qonaqúıler, meıramhanalar, jaǵajaılar men elıtalyq saýda aýdandary mańynda ańdyǵan. Yqtımal nysandy baqylaǵannan keıin olar jedel shabýyl jasap, saǵatty qoldan julyp alyp, skýtermen nemese mototsıklmen izin sýytyp otyrǵan.
Europol málimetinshe, lıýks sanatyndaǵy saǵattardyń qymbattaýy mundaı qylmystardy asa tabysty etip, qylmystyq toptardyń Eýropa boıynsha taralýyna yqpal etken.
Neapoldegi operatsııa aýqymdy halyqaralyq tergeýdiń bir bóligi ǵana. Jalpy is aıasynda Eýropanyń túrli elinde 31 adam ustalǵan.
Buǵan deıin Almatyda urlanǵan smartfondardy ótkizý arnasy anyqtalǵanyn habarladyq.
