Ispanııada turǵyn úı tapshylyǵyn joıý úshin 750 myń jańa baspana qajet
ASTANA. KAZINFORM – Madrıd, Barselona, Alıkante, Valensııa, Mýrsııa jáne Malaga qalalarynda salynǵan turǵyn úıler sany men jańadan qurylǵan úı sharýashylyqtary arasyndaǵy alshaqtyq eń joǵary deńgeıge jetip, 52,5 paıyz boldy, dep habarlaıdy Euronews.
Bul ásirese turǵyndardyń 36 paıyzyna deıin shoǵyrlanǵan atalǵan qalalardyń ortalyqtarynda aıqyn baıqalady.
— Turǵyn úı naryǵyndaǵy usynys suranystyń ósýine jetkilikti deńgeıde jaýap bere almady, — dep málimdedi Ispanııa banki el ekonomıkasynyń 2025 jylǵy jaı-kúıi týraly jyl saıynǵy baıandamasynda.
Retteýshi organnyń baǵalaýynsha, qalyptasqan teńgerimsizdikti joıý úshin jańadan paıda bolǵan úı sharýashylyqtary sany men qoljetimdi turǵyn úı usynysy arasyndaǵy aıyrmashylyqty jabý maqsatynda jalpy sany 750 myń jańa turǵyn úı qajet.
Alaıda bank sarapshylary bul jaǵdaı Ispanııanyń barlyq provıntsııasyna tán emes ekenin eskertedi. Mysaly, Avıla provıntsııasynda turǵyn úı qorynyń 58,2 paıyzy teorııalyq turǵyda naryqqa shyǵarylyp, usynysty arttyra alady. Al Madrıdte bul kórsetkish nebári 9,9 paıyz. El boıynsha ortasha kórsetkish — 27,1 paıyz. Elordadan keıin eń kúrdeli jaǵdaı Barselona, Alıkante, Valensııa, Mýrsııa jáne Malagada qalyptasqan.
Ispanııa banki turǵyn úı usynysynyń artýyna taǵy bir kedergi retinde turǵyn úılerdiń edáýir bóligi týrıstik nemese maýsymdyq jalǵa berý maqsatynda paıdalanylyp otyrǵanyn atap ótti.
Mundaı nysandar sany shamamen 400 myńǵa jetedi. Sonymen qatar kóptegen úı ıspandyqtar men sheteldikterdiń ekinshi baspanasy retinde qoldanylyp otyr.
— 2021–2025 jyldar aralyǵynda beırezıdentterdiń turǵyn úı satyp alýy barlyq mámileniń 7,4 paıyzyn qurady, bul jylyna orta eseppen 50 myń turǵyn úıge teń, — delingen baıandamada.
Bul másele ásirese Jerorta teńizi jaǵalaýynda ótkir seziledi.
Sondaı-aq el boıynsha taǵy bir paradoks baıqalady: 2000-jyldardaǵy qurylys qarqyny kezinde salynǵan shamamen 450 myń úı bos tur. Olardyń eshkim turmaıtyn sebebi — otbasylyq ómirge qolaısyz nemese tehnıkalyq jaǵdaıy nashar.
Turǵyn úı usynysynyń ósýine retteýshi kedergiler, bilikti jumys kúshiniń tapshylyǵy jáne turǵyn úıdiń basqa formattarǵa aýysýy da áser etip otyr.
Qujatta «Ispanııa men Portýgalııa jańa turǵyn úı qurylysynyń ósýi úı sharýashylyǵy sanynyń artýymen salystyrǵanda eń tómen bolǵan elderdiń qatarynda erekshelenedi» dep atap kórsetilgen. Qoldanystaǵy turǵyn úı qoryna qatysty jınaqtalǵan tapshylyq Ispanııada 6,6 paıyzdy, al Portýgalııada 3,7 paıyz.
Soǵan qaramastan, halqy aýyr turǵyn úı daǵdarysyn bastan ótkerip otyrǵan Portýgalııada tapshylyq kólemi 300 myń úı. Bul kórsetkish Ispanııadaǵy 750 myń úı tapshylyǵynan az bolǵanymen, Italııadaǵy 400 myń turǵyn úı jetispeýshiliginen joǵary.
Al Frantsııa jalpy alǵanda turǵyn úı teńgerimin saqtap otyr. Germanııa bolsa, turǵyn úı tapshylyǵyn 0,5 paıyzǵa qysqarta alǵan eýroaımaqtaǵy jalǵyz iri ekonomıka bolyp otyr.
Mýnıtsıpalıtetter, avtonomııalyq qaýymdastyqtar jáne ortalyq bılik arasyndaǵy normalardyń aıyrmashylyǵy men qaıtalanýy sııaqty bıýrokratııalyq kedergiler Ispanııada turǵyn úı qurylysyn jedeldetýge múmkindik bermeıdi.
Buǵan qosa, qala qurylysy josparlaryn basqarýdyń uzaqqa sozylýy, qolaıly jumys kúshiniń jetispeýi jáne eńbek ónimdiliginiń tómendeýi de áser etip otyr.
— Eldegi úı sharýashylyqtarynyń 36 paıyzy turatyn alty iri qalalyq aglomeratsııada salýǵa bolatyn, biraq áli júzege asyrylmaǵan turǵyn úılerdiń kólemi shamamen 1,1 mıllıon, — dep atap ótti Ispanııa banki.
Alaıda osy alty iri aglomeratsııanyń astanalarynda josparlanǵan turǵyn úı qurylysynyń áleýeti shamamen 320 myń nysanmen ǵana shekteledi.
Aıta ketelik Ispanııaǵa eki jylda 2 mln-nan astam mıgrant kelgen.
