Ispanııada turǵyn úı daǵdarysy órship tur
ASTANA. KAZINFORM — Madrıdte 87 jastaǵy Marıkarmen Abaskal 70 jyldan astam ýaqyt turǵan páterinen qýylǵannan keıin Ispanııada týyndaǵan jappaı narazylyq týyndap, el úkimeti turǵyn úı naryǵyndaǵy daǵdarysty retteýdiń josparyn ázirledi, dep habarlaıdy Kazinform Eýropa BAQ-taryna silteme jasap.
23 qyrkúıek kúni egde jastaǵy áıel Ispanııa astanasynyń Retıro aýdanyndaǵy páterinen qýyldy. Ol páterdi 1956 jyldan beri jalǵa alyp kelgen. Páterdi Urbagestión kompanııasy satyp alǵannan keıin aılyq jaldaý aqysy 500 eýrodan 2650 eýroǵa deıin ósip, artynsha 1650 eýroǵa turaqtanǵan. Marıkarmenniń qazirgi zeınetaqysy shamamen 1350 eýro. Kompanııa ájeıdi buǵan deıin de úsh márte qýyp shyqpaq bolǵan, biraq Ispanııa sottary tyıyp otyrǵan.
Aqyry 87 jastaǵy múgedek áıel aýrýhanaǵa jatqyzyldy, ony zembilmen alyp shyqqan. Osy oqıǵa Madrıdte, Barselonada jáne basqa da qalalarda úlken narazylyq týdyrǵan.
Ispanııa premer-mınıstri Pedro Sanches bul oqıǵany «áleýmettik tragedııa» dep atady.
Osydan keıin seısenbi kúni mınıstrler kabıneti osal topqa jatatyn jalǵa alýshylardy 2030 jylǵa deıin páterden qýyp shyǵýǵa tyıym salý, 2028 jyldyń 31 jeltoqsanyna deıin aıaqtalatyn qazirgi jaldaý sharttaryn eki jylǵa uzartý, qysqa merzimge páter jaldaý jáne bólme jaldaýǵa qatysty erejelerdi qataıtý, turǵyn úılerdi «quzǵyn qorlardyń» satyp alýyna 2028 jylǵa deıin shekteý qoıý sekildi sharalardy qamtıtyn eki korol jarlyǵyn maquldady.
Densaýlyq saqtaý mınıstri Monıka Garsııa bul sharalar eldegi 5 mıllıonnan astam adamǵa jeńildik ákelýi kerek dep málimdedi. Turǵyn úı mınıstri Izabel Rodrıges parlamentti paketti qoldaýǵa shaqyrdy jáne Kongresstiń «Marıkarmenge tartqan azaby bosqa ketpegenin aıtýǵa» múmkindigi bar dep atap ótti.
Jarlyqtar dereý kúshine enedi, biraq bir aı ishinde parlament bekitýi kerek. Úkimet máseleni juma kúni daýysqa salmaq. Alaıda parlamentte Pedro Sanchestiń koalıtsııasyna kiretin depýtattar basym emes.
Zeınetkerdiń advokaty Beatrıs Dýro úı ıesimen aldyn ala kelisimge qol jetkizilgenin habarlady: Marıkarmen segiz jyldyq jańa kelisimshart negizinde páterine orala alady. Jaldaý aqysy onyń zeınetaqysynyń 30%-yna jeter-jetpes bolady, ıaǵnı aıyna shamamen 460-500 eýro. Kelisimge zeınetker aýrýhanadan shyqqannan keıin ózi qol qoıýy kerek.
Eske sala keteıik, Qazaqstan men Ispanııa birlesken kólik jobalaryn ilgeriletýge ýaǵdalasty.
