Ispanııada túngi klýbta órt shyǵyp, 11 adam qaza tapty
Ispanııanyń ońtústik-shyǵysyndaǵy Mýrsııa qalasyndaǵy túngi klýbta bolǵan órt saldarynan 11 adam qaza tapty. QazAqparat bul týraly VVS-ge silteme jasap habarlaıdy.
Órt jergilikti ýaqyt boıynsha tańǵy 6-da Atalaıas aımaǵynda ornalasqan tanymal túngi klýbta bolǵan.
Bılik kóz jumǵandar sany artýy múmkin ekenin málimdedi. Tótenshe jaǵdaılar qyzmeti áli de joǵalǵan birneshe adamdy izdep jatyr.
Mýrsııa meri Hose Balesta ıspandyq 24h telearnasyna qalada úsh kún boıy aza tutý kúni jarııalanatynyn aıtty.
Onyń aıtýynsha, oqıǵa ornyna klýbta bolǵandardyń týystary keledi. Olar jaqyndaryn tabýǵa úmitti.
Órttiń neden shyqqany ázirge belgisiz.
