Ispanııada sý tasqynynan úsh adam qaza boldy

MADRID. QazAqparat – Ispanııanyń ortalyǵynda nóser jaýyn saldarynan qatty sý tasqyny bolyp, keminde úsh adam kóz jumdy, taǵy úsheýi iz-túzsiz joǵalyp ketti, dep habarlaıdy QazAqparat Reuters-ke silteme jasap.

Jergilikti bıliktiń habarlaýynsha, dúısenbi kúni avtomobıl men poıyz joldaryn, metro jelilerin sý basyp, olar jabylyp qaldy. Madrıdten ońtústik-batysqa qaraı 50 shaqyrymdaı jerde ornalasqan Toledo provıntsııasynda izdeý-qutqarý jumystaryna tikushaqtar tartyldy. Jeksenbi men dúısenbi kúni tańerteń Madrıd, Kastılııa-La-Mancha, Katalonııa jáne Valensııa provıntsııalarynda nóser jaýyn saldarynan kósheler laıǵa toldy. Kóptegen aýdandarda burshaq jaýdy. Toledo qalasynyń mańyndaǵy aýyldyq jerde úsh adam qaza boldy.

Ispanııa meteorologııalyq qyzmetiniń málimetinshe, jeksenbi kúni elde bir sharshy metrge 90 lıtr jaýyn jaýyp, rekordtyq jaýyn-shashyn tirkelgen. Polıtsııanyń habarlaýynsha, qaza bolǵandar arasynda ishi sýǵa tolǵan lıftte qalyp qoıǵan jas jigit bar. Taǵy bir adam sýǵa batqan kóliktiń ishinen tabyldy.

Sondaı-aq Kamarena qalasynda úıiniń janyndaǵy ózennen 50 jastaǵy er adamnyń denesi tabylǵany habarlandy.