Ispanııada sý astyndaǵy músinder murajaıy ashyldy
Ispanııanyń Lansarota aralynyń jaǵalaýynda, Las-Kolorados shyǵanaǵynda Djeıson De Keıres Teılor jasaǵan músinderdi ornatý bastaldy. Onyń týyndylary ekologııalyq taza betonnan jasalǵan, olar kúndelikti ómirdegi kórinisterdi beınelep, muhıt problemalary týraly aqparattandyrýǵa baǵyttalǵan.
12-15 metr tereńdikte ornatylatyn adamdardyń tylsym keıiptegi músinderi jasandy rıftiń bir bóligine aınalyp, sol mańdaǵy sý asty ekojúıesiniń damýyna septigin tıgizedi dep kútilýde.
Músindik kompozıtsııalardyń biri «Kontent» dep atalǵan, ol sý astynda selfı jasap jatqan jupty beıneleıdi. Ekinshi músindik top, «Rýbıkon» sý astynda kele jatqan 35 «adamnan» turady. Úshinshi top, «Lampedýza saly», qaıyqtaǵy bosqyndardy beıneleıdi. Barlyǵy «Museo Atlántico» dep atalady.
Músinderdi sý astyna túsip nemese túbinen sý asty kórinetin qaıyqtarǵa minip tamashalaýǵa bolady. Jobanyń quny 700 myń eýroǵa baǵalanýda, dep jazady The Local basylymy.
Buǵan deıin De Keıros Teılor osyǵan uqsas murajaılardy Bagam araldarynda ashyp, sondaı-aq Grenada jaǵalaýyna jaqyn jerde, Karıb teńiziniń túbine bireýin ornalastyrǵan.