Ispanııada poıyz apatqa ushyraǵan sátte mashınıst telefonmen sóılesip jatqan

Bul týraly Bı-Bı-Sı habarlaıdy.

Hose Garson Amo poıyz relsten shyǵyp keter aldynda telefon arqyly Renfe memlekettik temirjol kompanııasynyń qyzmetkerlerimen tildesken.

«Apatqa deıin birneshe mınýt buryn mashınıske Ferrolǵa deıingi baǵyttyń búge-shigesin túsindirý úshin jumys telefonymen habarlasqan. Olardyń áńgimesi men estiletin dybystar mashınıstiń kartaǵa nemese basqa qaǵaz qujatqa qaraǵanyn kórsetedi», - delingen tergeýshilerdiń habarlamasynda.

Sońǵy málimetter boıynsha mashınıst apat aldynda tejegishti basyp úlgergen. Nátıjesinde poıyzdyń jyldamdyǵy saǵatyna 192 shaqyrymnan 153-ke deıin azaıǵan. Deı turǵanmen apat oryn alǵan ýchaskede ruqsat etilgen jyldamdyq (saǵatyna 80 shaqyrym) eki ese asyrylǵan.

Buǵan deıin ıspandyq BAQ málim etkendeı, bir jyl buryn F.Amo óziniń Facebook-taǵy paraqshasyna poıyzdy jyldamdyqty asyryp basqaratynyn jazyp, dálel retinde spıdometrdiń sýretterin salǵan.

F.Amo eki kún buryn kepilge bosatyldy. Mashıst oılastyrylmaǵan adam óliminde kúdiktelýde. Ázirge oǵan resmı túrde aıyp taǵylǵan joq. Onyń pasporty men júrgizýshi kýáligin sot tárkiledi. F. Amo Ispanııa aýmaǵynan kete almaıdy jáne aptasyna bir ret sotqa kelýi tıis.

Eske sala keteıik, apat 24 shilde kúni máskeý ýaqytymen saǵat 22.40-ta oryn alǵan. Madrıdten Ferrol qalasyna bet alǵan Alvia júrdek jolaýshylar poıyzy Santıago-de-Kompostela qalasyna jaqyndaǵan kezde shuǵyl burylysta relsterden shyǵyp ketti. Apat saldarynan 79 adam ajal qushty.