Ispanııada poıyz apatynan qaza tapqandar sany artýy múmkin
ASTANA. KAZINFORM – Ispanııada Toledo provıntsııasynyń Ýrda eldi mekeni mańynda bolǵan poıyz apatynan qaza tapqandar sany artýy múmkin. Qazir keminde 69 adamnyń kóz jumǵany belgili. Elde qaıǵyly oqıǵaǵa baılanysty jalpyulttyq aza tutýdyń úshinshi kúni ótip jatyr, dep habarlaıdy Euronews.
Senbi kúni jergilikti turǵyndar men bılik ókilderi apat bolǵan jerge jaqyn ornalasqan ıspan aýylynda qaza tapqandardy eske alý rásimine qatysty. San-Hýan-Baýtısta shirkeýindegi oryndyqtar túgel tolyp, ondaǵan adam qulshylyqty syrttan tyńdady.
Qaza tapqandardyń týystary marqumdardyń máıitin anyqtaý jumystarynyń sozylýyna baılanysty alańdaýshylyq bildirip otyr. Ispanııa premer-mınıstri Pedro Sanches qaza tapqandardy sáıkestendirý jumystary barynsha jedel júrgizilip jatqanyn málimdedi.
Kastılııa-La-Mancha avtonomııalyq qaýymdastyǵynyń basshysy Emılıano Garsıa-Pah qaza tapqandar sany artýy múmkin ekenin joqqa shyǵarmady. Onyń aıtýynsha, qutqarýshylar adam denesiniń bólikteri salynǵan 31 qap jınaǵan.
Quqyq qorǵaý organdarynyń málimetinshe, habar-osharsyz ketkender týraly 67 ótinish áli qaralyp jatyr. Olardyń 14-i shetel azamattaryna qatysty. Atap aıtqanda, AQSh, Kanada, Aýstralııa, Frantsııa, Japonııa, Meksıka, Argentına, Venesýela, Týnıs jáne Chehııa azamattary izdestirilip jatyr.
Portýgalııa bıligi apattan qaza tapqandar arasynda poıyzdardyń birinde jumys istegen óz azamaty bar ekenin rastady. Senbi kúni Frantsııa azamatynyń da kóz jumǵany belgili boldy.
Qazir Kastılııa-La-Mancha aýrýhanalarynda 39 zardap shekken adam em qabyldap jatyr.
Sársenbide bolǵan bul apat Ispanııada bıylǵy ekinshi iri poıyz apaty sanalady. Sondaı-aq ol osy ǵasyrdaǵy Eýropadaǵy eń aýyr temirjol apattarynyń biri boldy.
Sanches temirjolǵa degen senimniń álsiregenin moıyndady
Ýrdadaǵy apat qarasha aıyndaǵy saılaý qarsańynda premer-mınıstr Pedro Sancheske túsetin saıası qysymdy kúsheıtti.
Juma kúni Sanches joǵary jyldamdyqty temirjol jelisine degen senimniń «kúıregenin» moıyndap, mundaı apattardyń qaıtalanýyna jol bermeý úshin sheshimder qabyldaýǵa ýáde berdi.
Oqıǵa Madrıd pen Sevılıany baılanystyratyn negizgi temirjol jelileriniń birinde bolǵan. Qańtarda da osy baǵytta poıyzdar soqtyǵysyp, Andalýsııada 46 adam qaza tapqan edi.
Poıyz mashınısteriniń Semaf kásipodaǵy temirjol qaýipsizdigin arttyrý úshin júıeli sharalar qabyldaýdy talap etip, 10 jáne 12 qarashada ereýil ótkizetinin jarııalady. Beısenbide mashınıster apatqa deıin josparlanǵan ereýilge de shyqqan edi.
Negizgi oppozıtsııalyq konservatıvtik Halyq partııasynyń jetekshisi Alberto Nýnes Feıhoo úkimetti eskirgen qaýipsizdik júıesin ýaqytynda jańartpaǵany úshin aıyptady.
Apattan qaza tapqandardyń biriniń týysy Sesılıo AFP agenttigine bergen suhbatynda endi poıyzǵa minýdiń ózi qorqynyshty bolyp qalǵanyn aıtty. Onyń pikirinshe, sońǵy toǵyz aıda bolǵan adam ólimine ákelgen oqıǵalar búkil qoǵam men saıasatkerlerdi temirjol qaýipsizdigi týraly oılanýǵa májbúr etýi kerek.
Aıta keteıik, Ispanııadaǵy birneshe ondaǵan adamnyń ómirin qıǵan poıyz apatyna ne sebep bolýy múmkin ekenin jazǵan edik.
