Ispanııada poıyz apatyna baılanysty úsh kúndik aza tutý jarııalandy
ASTANA. KAZINFORM – Ispanııada ondaǵan adamnyń ómirin qıǵan temirjol apatyna baılanysty 29-31 qazan aralyǵynda jalpyulttyq aza tutý jarııalandy. Bul týraly eldiń premer-mınıstri Pedro Sanches málimdedi, dep habarlaıdy Kazinform agenttiginiń menshikti tilshisi The Guardian basylymyna silteme jasap.
— Ispanııa qaıǵyǵa ortaqtasyp, zardap shekkenderge qoldaý bildiredi. Ispanııa Úkimeti men búkil memleket zardap shekkenderge jáne olardyń otbasylaryna qoldaý kórsetedi, – dedi Pedro Sanches.
Temirjol apaty Toledo provıntsııasyndaǵy Ýrda stantsııasynyń mańynda Renfe jáne Iryo kompanııalaryna tıesili poıyzdardyń soqtyǵysýy saldarynan bolǵan. Sońǵy málimet boıynsha, keminde 68 adam qaza tapqan.
Andalýsııada da úsh kúndik aza tutý jarııalandy
Ispanııanyń Andalýsııa aımaǵynyń bıligi de temirjol apatynan qaza tapqandarǵa baılanysty úsh kúndik aza tutý jarııalady. Bul týraly aımaqtyq úkimet basshysy Hýanma Moreno málimdedi.
— Biz qaıǵydan eseńgirep otyrmyz. Búkil Andalýsııa osy kezekti temirjol apatynan zardap shekkenderge qoldaý bildiredi, – dedi ol.
Buǵan deıin Sevılıa qalasynyń meri Hose Lýıs Sans ta úsh kúndik aza tutý jarııalap, barlyq resmı is-sharany toqtatý týraly sheshim qabyldaǵan.
Toledo provıntsııasyndaǵy poıyz apaty saldarynan keminde 64 adam qaza tapqany habarlanǵan. Aldyn ala boljam boıynsha, apatqa adam faktory sebep bolýy múmkin.
Eske sala keteıik, buǵan deıin Ispanııanyń Toledo provıntsııasyndaǵy joǵary jyldamdyqqa arnalǵan temirjol jelisinde eki poıyz soqtyǵysty, apat saldarynan 46 adam qaza tapqanyn jazdyq.
QR Syrtqy ister mınıstrligi Ispanııadaǵy temirjol apatynda qaza tapqandar men zardap shekkenderdiń arasynda Qazaqstan azamattary joq ekenin habarlady.
