Ispanııada poıyz apatyna baılanysty úsh kúndik aza tutý jarııalandy
ASTANA. KAZINFORM — Ispanııanyń premer-mınıstri Pedro Sanches eldiń ońtústigindegi poıyz apatynan keıin úsh kúndik aza tutý jarııalady, dep habarlaıdy Euronews.
Ispanııanyń premer-mınıstri Pedro Sanches kólik mınıstri Oskar Pýente jáne Andalýsııa úkimetiniń tóraǵasy Hýanma Morenomen birge Kordova provıntsııasyndaǵy Adamýs mýnıtsıpalıtetine bardy. Bul jerde keminde 39 adamnyń ómirin qıǵan temirjol apaty oryn alǵan.
Qala ákimi Rafael Anhel Moreno eń alǵashqy sátten bastap barlyq zardap shekkenderge kómek kórsetilgenin atap ótip, sondaı-aq qol ushyn bergen turǵyndarǵa da alǵys bildirdi.
Andalýsııa úkimetiniń tóraǵasy da Adamýs turǵyndarynyń yntymaq-birligin erekshe atap ótip, barlyq andalýsııalyqtardyń atynan rızashylyǵyn jetkizdi. Sonymen qatar ol bılik organdary men tótenshe qyzmetter arasyndaǵy is-qımyldardyń úılesimdi uıymdastyrylǵanyn oń baǵalady.
«Biz bárimiz qaza tapqandardy tabý jáne anyqtaý úshin jumys istep jatyrmyz. Alda áli uzaq ýaqyttyq jumys tur, soǵan qaramastan biz jalǵastyra beremiz. Bul oqıǵa Andalýsııanyń barlyq turǵynynyń júregin syzdatty. Aldymyzda uzaq jol bar, biraq biz birge bolsaq, mindetti túrde alǵa jyljımyz», dep túıindedi Rafael Anhel Moreno.
Óz kezeginde Pedro Sanches bul kúndi búkil el úshin, ásirese qaza tapqandardyń otbasylary úshin qaıǵy kúni dep atady.
Eske sala ketsek, keshe Ispanııada joǵary jyldamdyqty eki poıyz relsten shyǵyp, 21 adam qaza tapty. Keıinirek adam shyǵyna 39-ǵa jetti.