Ispanııada orman órtenip, 800-ge jýyq adam qaýipsiz jerge kóshirildi
ASTANA. QazAqparat - Ispanııanyń soltústik-shyǵysynda Katalonııa avtonomııalyq oblysynda orman órti oryn alyp, 800-ge jýyq adam evakýatsııalandy.
Bılik muny osy jylǵy eń iri órt dep atady: jalyn myńnan astam orman men aýyl sharýashylyǵyna jaramdy jerlerdi sharpydy. Dúısenbide Barselona batysyna qaraı 67 shaqyrym qashyqtyqta Oden mýnıtsıpalıtetinde kezekti órt oryn aldy. Aýa raıynyń jaqsarǵanyna qaramastan órt sóndirýshiler áli de jaǵdaıdy baqylaýǵa ala almaýda. Tilsiz jaýmen 22 tikushaq arpalysýda. Zardap shekkender jaıly derek joq. Budan buryn orman órtteri Ispanııanyń Andalýsııa, Astýrııa, Galısııa qalalarynda tirkelgen.
