Ispanııada mashınıst jumys ýaqytynyń aıaqtalǵanyna baılanysty jarty jolda poıyzdy toqtatqan
ASTANA. QazAqparat - Ispanııada júzden astam jolaýshysy bar poıyz baratyn jerine jarty jol qalǵanda toqtaǵan. Oǵan mashınıst aýysymynyń aıaqtalýy sebep boldy, dep jazady Bı-bı-sı.
Poıyz jergilikti ýaqytpen shamamen saǵat toǵyzda eldiń soltústigindegi Osorno aýylynda toqtady. Madrıdke bet alǵan jolaýshylar bara jatqan jerine jetý úshin avtobýstar men taksılerge otyrýǵa májbúr boldy. Olardy temirjol kompanııasy jaldaǵan.
Renfe memlekettik temirjol kompanııasy keıin olardan keshirim surap, bolǵan oqıǵaǵa qatysty ishki tergeý júrgizýge sóz berdi.
Renfe málimdemesine sáıkes, mashınıst ári qaraı júrýden bas tartqan joq. Ol tek ary qaraı jumysyn jalǵastyrǵan jaǵdaıda zańdy belshesinen basatyn bolǵan soń, amalsyz kólikti toqtatqan.
Ispanııalyq zańnamaǵa sáıkes mashınıster úzilissiz alty saǵattan astam jumys isteı almaıdy. Bul sharshaǵandyqtan týyndaıtyn apattardyń aldyn alý úshin jasalǵan shara.
Poıyz Osornoǵa jetkende mashınısti almastyratyn adamnyń bolmaǵany anyqtaldy. Bul týraly ıspanııalyq kásibı odaq ókili Karlos Segýrý habarlaǵan.
