Ispanııada Lufthansa áýe kemesi ushqyshsyz basqarylatyn ushaqqa soǵylyp qala jazdady
ASTANA. QazAqparat - Frankfýrttan Bılbaoǵa baǵyt alǵan Germanııanyń Lufthansa kompanııasyna tıesili Airobus A320 jolaýshylar ushaǵy qonýǵa jaqyndaǵanda úsh pılotsyz basqarylatyn ushaqpen soqtyǵysyp qala jazdady, dep habarlady izvestia.ru.
Ispanııalyq El País basylymynyń habarlaýynsha, oqıǵa ótken senbi kúni bolǵan, alaıda ol týraly endi ǵana jarııa bola bastady. Sebebi, Ispanııa polıtsııasy drondardyń ıesin izdeýdi kúsheıtken.
«Áýe kemesiniń ushqyshtary pılotsyz basqarylatyn ushaqty 900 metr bıikten baıqaǵan. Osy ýaqytta soǵylmaý amalyn qoldanǵandyqtan ushaqtyń qonýy qıyndady. Bortta barlyǵy 168 jolaýshy kele jatqan», delingen derekkózi taratqan aqparatta.
Drondardyń ıesin tabý úshin polıtsııa tikushaǵy shyǵarylǵanymen, olar tabylmady. Eger onyń ıesi anyqtalǵan jaǵdaıda, oǵan 250 myń eýro kóleminde aıyppul salynady.
Aıta ketý kerek, Ispanııa zańdarynda drondardy eldi mekendi jerlerde 120 metr bıiktikte ushyrýǵa tyıym salynǵan.
