Ispanııada lańkestikke qarsy operatsııa kezinde úsh adam ustaldy
ASTANA. QazAqparat - Ispanııa polıtsııasy Madrıdte júrgizgen lańkestikke qarsy operatsııa barysynda úsh adamdy tutqyndady, dep jazady «Habar 24».
Polıtsııa ókilderiniń aıtýynsha, qamalǵandardyń bireýi, ıaǵnı 32 jastaǵy marokkolyq «Irak pen Levant tobymen» tyǵyz baılanysta bolǵan. Quqyq qorǵaýshylar onyń sodyrlarmen qatynasyn áleýmettik jelidegi jazbalary arqyly anyqtaǵan.
Kúdikti Ispanııada turyp, mańaıyndaǵylardy arbaýmen aınalysqan. Al qalǵan eki adam osy kúdiktimen bir úıde turǵan.
Aıta ketý kerek, 2015 jyly Ispanııada terrorlyq qaýiptiń tórtinshi deńgeıi jarııalandy. Sodan beri munda 170-ten astam adam lańkestikke qatysy bar degen aıyppen tutqyndaldy.
