Ispanııada quspen soqtyǵysqan ushaqtyń bir bóligi zaqymdandy

ASTANA. KAZINFORM – Ispanııada Airbus ushaǵy áýejaıdan ushyp bara jatqanda quspen soqtyǵysý saldarynan qonýǵa májbúr boldy, dep habarlaıdy Daily Mail. 

Iberia IB579 reısi ushý kezinde qustarǵa soǵylǵannan keıin Madrıdke qonýǵa májbúr boldy. 
Daily Mail jarııalaǵan fotosýretter ushaqtyń tumsyq bóligi aıtarlyqtaı zaqymdanǵanyn kórsetedi.

Parıjge ushyp bara jatqan Airbus A321-253NY ushaǵynyń aldyńǵy bóligindegi materıal túsip qalǵan.

FlightRadar24 derekteri ushaqtyń áýejaıǵa qaıtyp oralmas buryn Madrıdtiń shetinde qysqasha aınalyp ótkenin kórsetti. Ol ushqannan keıin bir saǵattan astam ýaqyt ótken soń qondy.

Buǵan deıin AQSh-tyń Denver qalasyndaǵy halyqaralyq áýejaıda bortynda 179 adamy bar jolaýshylar ushaǵy órtengenin jazǵan bolatynbyz.