Ispanııada qurylysshy tapshylyǵy 600 myń turǵyn úıdiń jetispeýine alyp keldi

ASTANA. KAZINFORM — Ispanııadaǵy turǵyn úı daǵdarysy jaǵdaıynda el boıynsha bir sharshy metrdiń ortasha baǵasy 2438 eýroǵa deıin ósip, tarıhı maksımýmnan asyp tústi, dep habarlaıdy AZERTADJ.

Osyndaı jaǵdaıda turǵyn úı tapshylyǵy el ekonomıkasynyń ósýine basty qozǵaýshy faktorlardyń birine aınalyp otyr.

Ispanııadaǵy qurylys salasynda jumys kúshiniń tapshylyǵy 2020 jyldan beri eki esege artqan, bul óz kezeginde turǵyn úı jetispeýshiligine sebep boldy. ABC basylymynyń jazýynsha, Ispanııa banki 2025 jyly turǵyn úı tapshylyǵy 600 myń úı birligine jetedi dep boljaıdy.

BBVA Research kompanııasynyń «Qurylys jumysshylary: sebepteri men saldary» atty baıandamasynda turǵyn úı qurylysy 2020 jyldan beri qurylys salasyndaǵy jumysshy qoldarynyń tapshylyǵynyń eki ese ósýi men qurylysqa jaramdy jer ýchaskeleriniń jetispeýshiligi sııaqty máselelerge tap bolǵany atap ótilgen.

Qurylysshylar bul saladan jappaı ketip jatyr: bir bóligi qyzmet baǵytyn ózgertýde, endi biri erte zeınetke shyǵýda. 2024 jylǵy derekterge sáıkes, qurylys salasyndaǵy jumysshylardyń nebári 10%-y ǵana 30 jasqa deıingi azamattar bolsa, 35%-y 45 pen 54 jas aralyǵyndaǵy adamdardy quraǵan.

Sapaly jumysshy kúshiniń tapshylyǵynan bólek, qurylysqa arnalǵan jerdiń de jetispeýshiligi baıqalady. Sarapshylar jerdiń qoljetimdiligi máselesin ótken jyldyń aqpanynda Kongresstiń jer reformasyn qaıtadan qabyldamaýymen baılanystyrady. Bul problemalardyń qatarynda salaǵa qatysty shamadan tys retteýler bar, olar Ispanııany qamtyǵan turǵyn úı daǵdarysynyń áserin jeńildetýge qajetti myńdaǵan qurylys jobalarynyń iske asýyna kedergi keltirip keledi.

BBVA Research kompanııasynyń bas ekonomısi Mıgel Kardosonyń aıtýynsha, eger qurylys salasyndaǵy ónimdiliktiń toqyraýy jalǵasa berse, turǵyn úı baǵalary ósýdi toqtatpaıdy. Onyń sózinshe, bul baǵanyń qashan shegine jetetinin naqty boljaý ázirge múmkin emes.

Budan buryn Ispanııada aptap ystyq sońǵy eki aıda 1180 adamnyń ómirin jalmaǵyn jazǵanbyz.