Ispanııada quny 800 mln eýrodan asatyn kokaın tıelgen keme ustaldy
ASTANA. KAZINFORM - Ispanııanyń Azamattyq gvardııasy Batys Sahara jaǵalaýynda Arconian júk kemesin qolǵa túsirdi. Keme bortynan 30 tonna kokaın, qarý-jaraq pen oq-dári tabylǵan, dep habarlaıdy BILD.
Ispanııa sotynyń málimetinshe, operatsııa 1 mamyrda júrgizilgen. Alaıda bul týraly aqparat búgin ǵana jarııa boldy.
Keme Komor araldarynyń týymen júrgen. Ol Serra-Leoneden Lıvııaǵa baǵyt alǵan. Biraq tergeýshiler bul marshrýt shyn baǵytty jasyrý úshin qoldanylǵan dep esepteıdi.
Ustalǵan keme Kanar araldaryndaǵy Las-Palmas portyna jetkizildi.
Portta tárkilengen esirtki salynǵan myńnan astam paket arnaıy nómirlenip, aıǵaq retinde qoıylǵan.
Ispanııa bıligi tárkilengen kokaınniń qunyn 812 mln eýroǵa baǵalap otyr. Alaıda sarapshylar onyń qara naryqtaǵy baǵasy budan da joǵary bolýy múmkin ekenin aıtady.
Ispanııa quqyq qorǵaý organdary bul oqıǵany Eýropadaǵy eń iri esirtki tárkileý operatsııasy dep otyr.
Tergeý nusqasyna sáıkes, kokaın Ońtústik Amerıkadan jetkizilgen bolýy múmkin.
Ekıpaj esirtkini ashyq teńizde shaǵyn motorly qaıyqtarǵa tıep, keıin Ispanııa aýmaǵyna jetkizýdi josparlaǵan degen boljam bar.
Kemede bolǵan 23 teńizshiniń keıbiri operatsııa kezinde jasyrynýǵa tyrysqan.
Qazir ekıpajdyń barlyq múshesi qamaýǵa alynǵan.
Olardyń arasynda Nıderland, Sýrınam jáne Fılıppın azamattary bar.
Osyǵan deıin Shrı-Lankada 112 kg esirtki tasymaldaǵan 22 monah ustalǵany týraly jazdyq.
