Ispanııada koronavırýstyń jańa shtamyn juqtyrǵan 4 naýqas anyqtaldy
LONDON. QazAqparat –Ispanııada koronavırýstyń jańa shtamyn juqtyrýdyń alǵashqy jaǵdaılary anyqtaldy, dep habarlaıdy QazAqparat VVS-ge silteme jasap.
Senbi kúni tańerteń Ispanııa bıligi Ulybrıtanııada paıda bolyp, belsendi túrde tarap jatqan koronavırýstyń jańa shtamyn juqtyrýdyń alǵashqy tórt jaǵdaıy Madrıdte anyqtalǵanyn habarlady.
Ispanııa astanasynyń óńirlik ákimshilik ókilderi bul jaǵdaılardyń barlyǵy jaqynda Brıtanııadan oralǵan adamdarmen baılanysty ekenin aıtýda.
«Patsıentterde aýyr belgiler joq, biz bul shtamnyń tez taralatynyn bilemiz. Biraq odan da aýyr jaǵdaı týǵyzbaıdy. Alańdaýǵa negiz joq», - dedi Madrıdtiń Densaýlyq saqtaý qyzmeti dırektorynyń orynbasary Antonıo Zapatero.
Ol bıliktiń taǵy úsh yqtımal jaǵdaıdy tekserip jatqanyn atap ótti. Biraq taldama nátıjeleri kelesi aptada belgili bolady. Ispanııa azamattary men turǵyndaryn qospaǵanda, Madrıdke Ulybrıtanııadan kelýshilerge kirýge tyıym salyndy.
Sondaı-aq, Ulybrıtanııadan Shvetsııaǵa kelgen adamnan vırýstyń jańa shtamy tabylǵany týraly aıtyldy. Shved Densaýlyq saqtaý mınıstrliginiń habarlamasynda kórsetilgendeı, saıahatshy elge kelgende aýyryp, oqshaýlanǵan.
Nextstrain monıtorıng servısiniń derekteri boıynsha, koronavırýstyń jańa shtamy Danııa, Aýstralııa jáne Nıderland elderinde tirkelgen. Frantsııada da koronavırýstyń jańa shtammy tirkeldi.
Eske salsaq, jaqynda Ulybrıtanııa koronavırýstyń jańa shtamy anyqtalǵany jarııalandy.
Sonymen qatar, Qytaı koronavırýstyń jańa shtamy anyqtalǵan Ulybrıtanııamen áýe qatynasyn toqtatty.
