Ispanııada koronavırýs juqtyrǵandardyń sany kúrt ósti
NUR-SULTAN. QazAqparat – Ispanııanyń Densaýlyq saqtaý mınıstrligi sońǵy táýlik ishinde koronavırýs juqtyrýdyń 1 500 jaǵdaıy tirkelgenin jarııalady, dep habarlaıdy QazAqparat tilshisi.
Qazirgi tańda COVID-19 juqtyrǵandardyń sany 5 153 adamǵa jetken. Ispanııa Eýropa elderiniń ishinde koronavırýs juqtyrǵandardyń sany boıynsha ekinshi orynda tur. Italııada qazirgi tańda koronavırýs juqtyrǵandardyń sany 15 myńnan asyp ketken.
Ispanııa Úkimeti elde tótenshe jaǵdaı jarııalaǵaly otyr. Buǵan deıin koroldik tarıhynda TJ bir ret qana jarııalanǵan.
Aıta ketsek, buǵan deıin Dúnıejúzilik densaýlyq saqtaý uıymy Eýropanyń qazirgi tańda pandemııa «epıtsentri» ekenin jarııa etken edi. Eýropanyń birneshe eli keıingi kúnderi vırýs juqtyrǵandardyń sany men ólim-jitim jaǵdaıy kúrt óskenin habarlaýda.
