Ispanııada karantın talaptary birtindep jumsara bastaıdy
LONDON. VVS – QazAqparat – Koronavırýs órshýinen eń kóp zardap shekken elderdiń biri – Ispanııa qatań karantın rejımin jumsartýǵa kiristi. Bul karantın eldiń ekonomıkasyn tyǵyryqqa tiregen bolatyn, dep jazady VVS.
Óndiris oryndarynda, qurylys salasynda jáne basqa da saladaǵy birqatar qyzmetkerlerdiń jumysqa oralýyna ruqsat berildi. Biraq olardyń bári qaýipsizdik tehnıkasy erejelerin qatań ustanýǵa tıis. Al odan basqa halyq báribir úıinde qalady.
Ispanııada qaýipti indetten 17 500-ge jýyq adam qaıtys bolǵan. Áıtse de, jańadan juqtyrý faktileri azaıyp keledi.
Dúısenbide eldiń densaýlyq saqtaý mınıstrligi elde aýrýdan ólgen halyqtyń sany azaıǵanyn málimdedi. Sońǵy 24 saǵatta 517 adam qaıtys bolǵan. Jeksenbide bul kórsetkish 619 bolatyn. Sońǵy málimetke sensek, elde 17 489 adam koronavırýstan kóz jumǵan.
Jańadan juqtyrý jaǵdaılary kún sanap tómendep otyr. Elde koronavırýsqa shaldyqqan 169 496 adam bar.
Dúısenbide el úkimeti 27 naýryzda engizilgen keı shekteýlerdi alyp tastady. Sóıtip qashyqtan jumys isteýge múmkindigi joq kásiporyndardy qaıta ashýǵa ruqsat berdi.
Sheneýnikter qoǵamdyq kólikte júrgenderge 10 mıllıon maskany tegin taratýdy kózdep otyr.
Pasha – eldiń basty merekeleriniń biri. Biraq bıyl 1930 jyldan beri birinshi ret elde pasha sherýi bolǵan joq.
