Ispanııada ishinde radıoaktıvti zattar bar shabadan joǵaldy
ASTANA. QazAqparat - Ispanııanyń ıAdrolyq qaýipsizdik boıynsha keńesi ishinde radıaktıvti materıaldar bar shabadannyń joǵalǵanyn jarııalady, dep habarlaıdy Bı-bı-sı.
Másele tsezıı-137 men amerıtsıı-241 týraly bolyp otyr. Olar radıatsııanyń azdaǵan mólsherin shyǵarsa da, keńes belgili bir jaǵdaıda bul zattar adamdar úshin qaýipti bolatynyn eskertip otyr.
Jergilikti BAQ-tyń habarlaýynsha, radıaktıvti zattar ınjenerlik-qurylys kompanııasynyń ıeligindegi jerdiń tyǵyzdyǵy men sýlylyǵyn ólsheıtin arnaıy quraldarda qoldanylǵan.
Bul quraldar kompanııanyń óz kóligimen tasymaldaǵan sarǵylt tústi shaǵyn şabadanda saqtaldy. Alaıda endi bul shabadan iz-tússiz joǵalyp ketti. Ony urlap áketýi de múmkin, alaıda kompanııada buǵan tolyq senimdi emes.
Tsezıı-137 men amerıtsıı-241 ádette ólsheý jabdyqtarynda paıdalanylady. Radıaktıvti zattardy jikteý kezinde olarǵa qaýiptiliktiń bes deńgeıiniń tórtinshisi berildi. Birinshi deńgeıdegi zattar eń qaýipti, al besinshidegi - qaýiptiligi tómen bolyp sanalady.
