Ispanııada eki joǵary jyldamdyqty poıyz relsten shyǵyp, 21 adam qaza tapty
ASTANA. KAZINFORM — Ispanııanyń EFE aqparat agenttiginiń habarlaýynsha, Ispanııanyń ońtústigindegi Kordova provıntsııasyna qarasty Adamýz qalasynda eki joǵary jyldamdyqty poıyzdyń relsten shyǵýy saldarynan 10 adam qaza tapty, dep habarlaıdy Elpais.com.
Belgili bolǵan derekterge súıensek, jaraqat alǵandar sany ártúrli kórsetiledi — olardyń sany 25-ten 100 adamǵa deıin bolýy múmkin.
BAQ málimetterine sáıkes, aldymen Malagadan Madrıdke baǵyt alǵan poıyz relsten shyqqan. Ol qarsy baǵyttaǵy jolǵa shyǵyp ketip, sol sátte ol jolmen kele jatqan ekinshi poıyzben soqtyǵysqan, sonyń saldarynan ol da relsten shyqqan.
Apat ornynan túsirilgen vıdeolarda soqtyǵysýdan keıin keminde bir vagon nemese lokomotıvtiń aýdarylyp qalǵany kórinedi.
Soqtyǵysýdyń kúshi «jer silkinisindeı boldy», dep AFP agenttigi poıyz jolaýshylarynyń biriniń sózin keltiredi.
Aldyn ala málimetter boıynsha, eki poıyzdyń quramynda jalpy sany 400-ge deıin adam bolýy múmkin. Osy ýchaskedegi poıyz qozǵalysy tolyqtaı toqtatyldy.
«Kelip túsip jatqan aqparat óte aýyr», dep jazdy Ispanııanyń kólik mınıstri Oskar Pýente H (burynǵy Twitter) áleýmettik jelisinde.
Aıta keteıik, byltyr jeltoqsan aıynda bolǵan Meksıkadaǵy poıyz apatynan 13 adam qaza taýyp, 98 adam jaraqat aldy.