Dımashtyń Ispanııadaǵy jankúıerleri qazaqy rýhta beınerolık túsirip jatyr

ASTANA. KAZINFORM — Ispanııanyń ońtústigindegi Galısııa óńirindegi O Val Mınor alqabynda qazaqstandyq ánshi Dımash Qudaıbergenniń jankúıerleri onyń mamyr aıyndaǵy týǵan kúnine arnap beınequttyqtaý túsirip jatyr. Bul týraly La Voz de Galicia basylymy habarlady.

Túsirilim jumystary Oıe eldi mekenindegi Moreıras fermasynda bastalǵan. Kadrlarda attar men búrkitpen ań aýlaý kórinisteri kórsetilgen. Keıin joba qatysýshylary O Val Mınor alqabyna baryp, sol jerde kıiz úıler tikken.

Uıymdastyrýshylar bul oryndy kezdeısoq tańdamaǵanyn aıtady. Olardyń sózinshe, Galısııa jylqylary men qazaq jylqylarynyń sımvolıkalyq uqsastyǵy bar. Bul óńir jabaıy jylqy úıirlerimen tanymal.

Jobaǵa Ispanııanyń túrli óńirlerinen shamamen 25 adam qatysyp jatyr. Qatysýshylardyń eń úlkeni 72 jasta. Uıymdastyrýshylardyń biri — jýrnalıst Iolanda Garsııa, ol ánshiniń Ispanııadaǵy resmı fan-klýbynyń múshesi.

Dımash Qudaıbergen álemniń kóptegen elinde kontsert berip, úlken zaldardy toltyryp júr. Ol onnan astam tilde án oryndaıdy jáne akademııalyq vokal men pop-mýzykany úılestiredi. Ánshiniń vokaldyq dıapazony alty oktavadan asady. Ol óner kórsetken sahnalardyń qatarynda Nıý-Iorktegi áıgili Madison Square Garden kontsert alańy da bar.

Túsirilimge qatysqan keıbir jankúıerler ánshiniń mýzykasy olardyń ómirge degen kózqarasyn ózgertkenin aıtady. Mysaly, Orense qalasynyń 47 jastaǵy turǵyny Elızabet Barrera Barselonadaǵy kontsertten keıin qazaq tilin úırene bastap, Qazaqstanǵa barýdy armandaıtynyn jetkizgen.

Buǵan deıin Qazaqstannyń halyq ártisi Dımash Qudaıbergen túrki álemi mádenıetin damytýǵa qosqan eleýli úlesi úshin marapattalǵan. Oǵan TÚRKSOI uıymynyń eń joǵary marapaty sanalatyn «Túrki áleminiń mádenıet elshisi» atty arnaıy orden tabystaldy.