Ispanııada Dımashpen án shyrqaǵan qazaq qyzy áserimen bólisti
ASTANA. KAZINFORM – 8 qarashada Barselonada ótken jeke kontsertinde Dımash Qudaıbergen jankúıerimen birge sahnada án shyrqady. 15 jastaǵy qazaqstandyq Jánel Álı erekshe sátten alǵan áserimen Jibek Joly arnasynyń «Búgin LIVE» baǵdarlamasynda bólisti.
Jánel kontsertke ulttyq naqyshta arnaıy kıim tiktirgenin aıtty.
– Dımashty sheteldikter uıyp tyńdaıdy. Sonyń áserinen qazaq tilin, dástúrin úırengisi keletinder bar. Qazaqtyń oıýly ulttyq kıimin kıip barǵanymda bári tańǵaldy. Kontsertte Dımash «Qazaqtar, barsyńdar ma?» dep surady, sol kezde men alǵa umtylyp sahnaǵa kóterildim. Birge «Umytylmas kún» ánin shyrqadyq. Alǵan emotsııamdy aıtyp jetkize almaımyn, – deıdi ol.
Jánel – ánshini súıip tyńdaıtyn kishkentaı jankúıerlerdiń biri. Ózi de ónerge jaqyn. Dımashqa eliktep ósip kele jatqan jas ánshi bolashaqta qazaqtyń atyn álemdik deńgeıde jańǵyrtýdy armandaıdy.
– Qazir Ispanııada opera vokalynda oqyp jatyrmyn. Aldaǵy ýaqytta opera men estrada vokalyn biriktirip, án shyrqaǵym keledi. Dımash aǵa sekildi qazaqtyń ánin álemge tanytý – maqsatym, – deıdi jas ánshi.
Aıta keteıik, jaqynda Dımash Qudaıbergen Brıtanııanyń «The Upcoming» jýrnalyna suhbat berdi.