Ispanııada Dımash jankúıerleriniń keshinde sheteldegi qazaq balalarynyń sýretter kórmesi ótti
ASTANA. KAZINFORM – Madrıdte Dımash Qudaıbergenniń DIMASH álemdik týry aıasynda ótken jankúıerler keshinde shetelde turatyn qazaq balalarynyń shyǵarmashylyǵy kópshilik nazaryna usynyldy. «Otandastar qory» uıymdastyrǵan «Qazaqstan – meniń kózimmen» halyqaralyq baıqaýynyń kórmesine toǵyz elde turatyn balalardyń týyndylary qoıyldy.
Kórmege Japonııa, Nıderland, Birikken Arab Ámirlikteri, Grýzııa, Katar, Reseı, Mońǵolııa, Ózbekstan jáne Qyrǵyzstanda ósip jatqan qazaq balalarynyń jumystary qoıyldy.
Otandastar qory kórmeni Madrıdtegi qazaq mádenı ortalyǵymen birlesip uıymdastyrdy. Sharaǵa 500-ge jýyq adam qatysty. Olardyń qatarynda Dımashtyń ónerin tamashalaý úshin álemniń túkpir-túkpirinen Ispanııa astanasyna kelgen jankúıerler, Eýropanyń 20-ǵa jýyq elinen kelgen qazaq dıasporasynyń ókilderi men Ispanııadaǵy otandastar boldy.
«Qazaqstan – meniń kózimmen» baıqaýyna qatysqan balalar týǵan elin óz paıymymen beınelegen. Biri qazaq dalasynyń tabıǵatyn, endi biri ulttyq dástúr men mádenı murany sýret arqyly jetkizgen.
Uıymdastyrýshylardyń aıtýynsha, kórmeniń maqsaty – Qazaqstannyń mádenıeti men ulttyq ónerin shetelde tanytý, sondaı-aq qazaq mádenı ortalyqtarynyń baılanysyn nyǵaıtý.
Jankúıerler keshiniń baǵdarlamasy qazaqtyń dástúrli óneri men ıspan mádenıetin toǵystyrdy. Kesh jas dombyrashylar Álınur men Álıhan Amangeldilerdiń oryndaýyndaǵy «Balbyraýyn» jáne «Er-Turan» kúılerimen ashyldy.
Sevılıa qalasyndaǵy El Boti flamenko mektebiniń bıshileri qazaqtyń «Aqerke» halyq ánine flamenko mánerinde qoıylym usyndy. Al «Naz» memlekettik bı teatrynyń ártisteri «Shashý», «Qalyńdyq bıi», «Aqqý», «Shernııaz» jáne «Samǵaý» bılerin oryndady.
Balalarǵa arnalǵan baǵdarlamada «Tátti ertegi» jobasy aıasynda jaryq kórgen «Shahmatshy Qonjyq» kitaby tanystyryldy. Sonymen birge Tildes KZ sóılesý klýbynyń jumysy týraly aqparat berildi.
Buǵan deıin Dımash Qudaıbergen Ankarada túrki áleminiń óner juldyzdarymen bir sahnada óner kórsetken edi.