Ispanııada bir táýlikke jalǵasatyn jalpyhalyqtyq ereýil ótedi
ASTANA. KAZINFORM — Ispanııada turǵyn úıge qoljetimdilikti qamtamasyz etý jáne jalaqyny kóterý talabymen 24 saǵattyq jalpyhalyqtyq ereýil ótedi, dep habarlaıdy TASS.
Ereýil kúni eldiń túrli qalalarynda narazylyq sherýleri uıymdastyrylady. Aktsııany eki iri kásipodaq birlestigi — Jumysshylar komıssııalary kásipodaq konfederatsııasy (CC OO) men Jalpy eńbekshiler odaǵy (UGT) qoldady.
Ereýil ótkizý týraly sheshim qazan aıynda Ispanııada turǵyn úı daǵdarysyna qarsy narazylyq aktsııalary ótip jatqan kezde jarııalanǵan. Jalpyhalyqtyq ereýil 29 qarashaǵa belgilengen kezekten tys parlament saılaýyna eki jarym apta qalǵanda uıymdastyrylyp otyr.
Jumysshylar komıssııalary kásipodaq konfederatsııasy ókilderiniń aıtýynsha, qazirgi jalaqy kúndelikti ómir súrýge jetpeıdi. Baspanaǵa alý qıyndaǵan, al baǵanyń ósýi halyq tabysynyń kóp bóligin qurap otyr.
— Kóp kompanııanyń tabysy artyp jatqanymen, jumysshylardyń edáýir bóligi áli de mardymsyz jalaqy alady. Turǵyn úı máselesi teńsizdiktiń negizgi sebepteriniń birine aınaldy, — dep málimdedi kásipodaq.
Uıym ókilderi jalaqyny kóterýdi, ár azamattyń baspanaǵa qol jetkizý quqyǵyn qamtamasyz etetin turǵyn úı saıasatyn júrgizýdi, memlekettik qyzmetter júıesin nyǵaıtýdy jáne zeınetaqyny laıyqty deńgeıge jetkizýdi talap etti. Sondaı-aq jumysshylardyń densaýlyǵy syr bergen jaǵdaıda da jumysyn jalǵastyrýǵa májbúr bolmaıtyndaı eńbek jaǵdaıyn jasaýdy usyndy.
UGT kásipodaǵy da osyǵan uqsas talaptar qoıdy. Uıym ókilderiniń pikirinshe, baǵa ósip, myńdaǵan adam baspanaǵa qol jetkize almaı otyr. Al kompanııalardyń tabysy jumysshylardyń esebinen artyp keledi.
Kásipodaq 2027 jyly eń tómengi jalaqyny keminde 7 paıyzǵa kóterýdi usyndy. Sonymen qatar jyljymaıtyn múlik naryǵyndaǵy alypsatarlyqqa qarsy sharalar qabyldap, halyqtyń laıyqty baspanaǵa qol jetkizýin qamtamasyz etýdi talap etti.
Ispanııa bıligi ereýil kezinde de jumysyn jalǵastyrýǵa tıis mańyzdy salalar men qyzmetkerlerdiń eń tómengi sanyn belgiledi. Keıbir mekeme qyzmetkerleri narazylyq aktsııasyna qaramastan jumysqa shyǵýǵa mindetti.
Aıta keteıik, Madrıdte 87 jastaǵy Marıkarmen Abaskal 70 jyldan astam ýaqyt turǵan páterinen qýylǵannan keıin Ispanııada jappaı narazylyq týyndap, el úkimeti turǵyn úı naryǵyndaǵy daǵdarysty retteýdiń josparyn ázirledi.
Al bir aptadan asa ýaqyttan soń eldegi jappaı narazylyqqa sebepshi bolǵan 87 jastaǵy keıýana qaıtys boldy.
Buǵan deıin Ispanııa premer-mınıstri jappaı narazylyqtan keıin kezekten tys saılaý jarııalady. Saılaý 29 qarashada ótýi tıis.
