Ispanııada bıiktigi 12 metrlik tolqyn týdyratyn alapat daýyl kútilip otyr

ASTANA. KAZINFORM — Ispanııanyń týrıster kóp baratyn Maıorka aralynda qysqy maýsymnyń eń kúshti daýyly kútilip otyr: shyǵys jaǵalaýynda tolqyn bıiktigi 10–12 metrge jetýi múmkin, al jeldiń jyldamdyǵy saǵatyna 90 km-ge jetedi, dep habarlaıdy BILD.

Meteorologtardyń málimetinshe, jeldiń kúshi 12 baldyq shkala boıynsha 8–9 balldy quraıdy, bul daýyl deńgeıine sáıkes keledi. Osylaısha atalǵan aýmaqta eń joǵary qaýip deńgeıi jarııalandy.

Qysqy mezgilde týrıster Balear araldaryna ortalyq Eýropadaǵy sýyq jáne ylǵaldy aýa raıynan qashyp keledi, alaıda qazir olarǵa kúshti daýyl qaýip tóndirýi múmkin. AEMET meteoqyzmeti jergilikti bılikke jaǵalaýda serýendeýge tyıym salýdy usynyp otyr.

— Nazar aýdaryńyzdar jáne aýa raıy boljamyn únemi tekserińizder. Qaýipti aımaqtarda nemese ashyq jerlerde jaraqattar men múliktik shyǵyndary bolýy múmkin, — dep eskertti sınoptıkter.

Dese de araldaǵy aýa raıy aldaǵy demalys kúnderi jaqsarady degen boljam bar. Kún kózi ashylyp, ótkinshi jańbyr jaýyp, aýa temperatýrasy 14°C–tan 19°C deıin kóterilmek.

Eske sala keteıik, buǵan deıin Ispanııaǵa kórshiles Portýgalııada «Klaýdııa» daýyly basylmaı turǵanyn jazdyq. 

Al qazan aıynyń sońynda Karıb jaǵalaýynda bolǵan «Melıssa» daýyly saldarynan 49 adam qaza tapty.