Ispanııada Barselonadaǵy teraktige baılanysty aza tutý kúni jarııalandy

ASTANA. QazAqparat - Ispanııada Barselonada bolǵan teraktige baılanysty úsh táýlikke aza tutý kúni jarııalandy. Bul týraly koroldiktiń premer-mınıstri Marıano Rahoı memlekettik qaýipsizdik qyzmetiniń ókilderimen bolǵan májilisten málim etti, dep habarlaıdy Rıa Novostı.

Ispanııadaǵy memlekettik organdardyń barlyǵynda memlekettik týlar tómen túsiriledi.

«Zardap shekkenderdiń jaqyndary men týystary qazir biz úshin basty másele. Barselonalyqtar tartqan zardapty qazir Madrıd, Parıj, Brıýssel, Nıtstsa, Londondyqtar da sezinip otyr»,-dedi premer-mınıstr óziniń sózinde.

«Biz sonymen qatar birliktiń, polıtsııa operatsııalarynyń, halyqaralyq qoldaý men órkenıettiń qundylyqtaryn tabandy qorǵaý nıetiniń arqasynda terrrorızmdi jeńýge bolatynyn bilemiz»,-dedi ol.

Rahoı bolǵan oqıǵany «jıhad terrorızmi» dep atady jáne oǵan jahandyq deńgeıde jaýap berý qajettigin aıtty.

«Búginde terrorızmmen kúres erkin, ashyq qoǵamnyń jáne bizdiń basymdyǵymyz bolyp otyr. Bul jahandyq deńgeıdegi qater. Osyǵan qaraı oǵan beriletin jaýap ta jahandyq deńgeıde bolýy tıis»,-dedi ol.

Keshe, 17 tamyz kúni shaǵyn avtobýs Barselonanyń ortalyǵyndaǵy Rambla kóshesinde jaıaý júrginshilerdi basyp ótti.

Sońǵy málimetter boıynsha, 13 adam qurban bolyp, 100 adam zardap shekti. Júrgizýshi oqıǵa ornynan boı tasalap úlgerdi. Kúdikti eki adam tutqyndaldy, olar Soltústik Afrıka turǵyndary ekeni belgili boldy. Terakt úshin jaýapkershilikti «Islam memleketi» uıymynyń ókilderi moıyndary aldy.