Ispanııada aptap ystyqtan júzim jınaý bıyl óte erte bastaldy
ASTANA. KAZINFORM - Ispanııada aptap ystyqqa baılanysty júzim jınaý naýqany el tarıhynda alǵash ret osynshalyqty erte bastaldy. Katalonııa óńirinde sharýalar júzim jınaýǵa 22 shildede kiristi, dep habarlaıdy AZERTAC.
Joǵary temperatýra júzimniń ádettegiden áldeqaıda jyldam pisýine sebep boldy. Osyǵan baılanysty sharap óndirýshiler ónimdi erterek jınamaq.
Qazir Katalonııada kúndiz aýa temperatýrasy 35-45 gradýsqa deıin kóteriledi.
Reuters Climate Monitor málimetinshe, Barselonada shildedegi ortasha temperatýra 65 jyl burynǵy kórsetkishten shamamen 6 gradýsqa joǵary.
Aptap ystyq júzim jınaýshylardyń jumysyn qıyndatty. Jumysshylar qarańǵyda eńbek etý úshin mańdaısham taǵyp, júzim butaqtaryn sekatormen kesýge májbúr.
Katalonııalyq sharap óndirýshi Reuters agenttigine bergen suhbatynda keıbir jumysshylardyń densaýlyǵyna baılanysty qıyndyqtar týyndaǵanyn aıtty.
Sharap óndirýshiler aldaǵy jyldary júzimdi ádettegiden áldeqaıda erte jınaý jaǵdaıy jıileıdi dep boljap otyr.
Júzimdi erte jınaý – klımattyń ózgerýine baılanysty Eýropadaǵy júzim sharýashylyǵynyń jaǵdaıǵa beıimdelýiniń bir mysaly.
Eýropanyń túrli sharap óndiretin óńirlerinde temperatýranyń joǵarylaýy men qurǵaqshylyq júzimniń erte pisýine áser etip otyr.
Jahandyq jylyný Nıderlandtaǵy júzim ósirýshilerge de yqpal etip otyr.
Alaıda bul eldegi sharap óndirýshiler úshin jyly klımattyń paıdasy bar. Joǵary temperatýra júzimniń jaqsy pisýine múmkindik beredi.
Osynyń nátıjesinde sońǵy jyldary Nıderlandta sharap óndirisi salasy qarqyndy damyp keledi.
Osyǵan deıin Serbııa men Horvatııada aptap ystyqtyń jańa tolqyny bastalǵany týraly jazdyq.
https://kaz.inform.kz/news/serbiya-men-horvatiyada-aptap-istiktin-zhana-tolkini-bastaldi-a3d3f8a4
